[Erreportajea] Artea letra larriz aiztur eta lehorgailu artean
Clash ile apaindegia ez da oso handia, estu samarra da. Baina bertako espazioa erabat eraldatu duen murala sortu du Jesus Bernal ‘Jes’-ek. Lan hori eta beste hainbat nazioarteko lehiaketa batera aurkeztu ditu.
Jes, sortu duen Kontxako muralari argazkia ateratzen, ispilutik. Handik begiratuta hartzen du zentzu osoa lanak. Lezoko sarreretako batean, Donibane kalekoan, ile apaindegi bat dago, Clash, 1988an sortua. Izenak berak intentzio baten berri ematen du: sormena eta ileen apainketa uztartuko dituen espazioa da. «Pelukeriaren izenean nire musika zaletasunen berri ematen dut. Oso gogoko dut The Clash taldea», zehaztu du Jesus Bernal Jes-ek, espazioaren arduradunak. Horraino dena normal. Lokalera sartzerakoan, ordea, ezkerraldean dagoen muralak arreta pizten du; Kontxako badia da, handi-handian, Jesek egina.
Ile apaindegiko ispilutik begiratuta, eta zehazki ile mozketa egiteko aulkian eserita, lanaren dimentsio osoa ikus daiteke bizkarraren atzetik: horman laua dirudienak, beste traza bat hartzen du, bizitza. «Hor goza daiteke benetan koadroaz, eserita. Inguratu eta jaten zaitu. Begiak zerumugaren parean kokatzen dira, urrun-urrunera begira bezala. Hori magia da», azaldu du. Francisco de Goyaren 3 de mayo en Madrid koadroaren neurri berberak dauzka paretako muralak Jesek zehaztu duenez, 3,60 metro zabal eta 2,40 altu.
Hura egin aurretik, ordea, Kontxako 1.500 bat argazki atera zituen sortzaileak, haietan jasotako informaziotik lokala zeharo eraldatzen duen artelana osatzeko. «Begira, hor Jaizkibelgo lehen torreoia daukat. Badira urte batzuk egin nuela. Mendian jasotako harriekin egin nuen erreplika. Sona handia lortu zuen ere lan horrek»; harro dago Jes lantokiaren atrezzo-arekin.
Lehiaketa
Egindakoa ez du Lezon soilik utzi nahi. Luxenburgoko Museoak antolatzen duen lehiaketara aurkeztu ditu Kontxako murala, torreoia eta beste koadro bat. Artista berrientzako sariketa da, «Got talent antzekoa». Agiri emate luze baten ondoren, lehiaketarako onartuko ote duten esperoan da lezoarra orain. «Nire zati bat eman dut lehiaketarako. Kontatzeko zerbait dudala uste dut. Horregatik aurkeztu naiz».
Duen artea zabaldu nahi du Jesek. Hark egindakoek jendearen harridura eta oniritzia dutela badaki, gustura ikusten dituzte sortutakoak. «Orain enkarguak jasotzeko prest nago. Edonor etor daiteke nigana nahi duena eskatzera». Irribarre batekin, ile mozketa artean, gustura egingo die harrera.
