[Erreportajea] Auzolanean koloreztatuko dituzte frontoiaren hormak
Bi urte beteko dira Gaztañoko frontoiaren lanak bukatu zituztenetik. Orain, bertako horma zuriak kolore biziz betetzeko auzolana egiten ari dira auzo elkartearen ekimenez.
Marta Portela eta Aitor Sanz Mendiburu, muralean. Gaztaño eta auzolana eskutik helduta datoz. Auzo horrek, bere izaeraren ezaugarri du ekiteko modu hori, eta oraingoan ere, auzolanean ekin dio pilotaleku berriko paretak koloreztatzeari. «Auzoko hormak irudiekin janztekoaren aldekoak gara, eta horrela jardun dugu orain arte. Uste dugu horrek izaera bat ematen diola auzoari, gure nortasunaren adierazle dela», azaldu du Aitor Sanz Mendiburuk, auzo elkarteko kideak.
Egiteko horretan, auzoarekin lotutako beste gai guztiekin bezala, auzotarren inplikazioa eta parte hartzea sustatzen saiatu da behin eta berriz auzo elkartea, «auzolana ekiteko eta aritzeko modu gisa ulertzen dugulako auzotarrok». Elkarlan hori frontoi berrira eraman dute orain, eta bere horma luze-zabalak mural koloretsuarekin jantziko dituzte. Auzotar baten bidez, Marta Portela San Pedron bizi den galiziarra ezagutu zuten, —Zintzilik irrati librean saioa egiten du—, hark egindako egutegi bat ikusi, eta bertako marrazkiek atentzioa eman zieten. «Proposatu genion frontoiko hormak margotzeko proiektua egingo ote zuen, eta baiezkoa eman zigun».
Udalari baimena eskatzeko egitasmoa aurkeztu zuten, eta baiezkoa jasota, joan den astean bertan hasi ziren lanean. Lehen deialdian pareta guztiak zuritu egin zituzten. Auzotarren erantzuna paregabea izan zela azaldu du Sanzek, adin guztietako hogei bat auzotar bertaratu zirelako. Aste honetan berriro bildu dira frontoira lanean jarraitzeko, murala markatzen hasiak dira. Deialdiak zehaztu gabe dituzte, baina auzokideei aldez aurretik jakinaraziko dizkiete.
Auzolanaren balioak iruditan
Portelak auzolana jarri du sortu dituen irudien oinarrian, Gaztañoren nortasunarekin bat eginez: «Euskal Herriak eta Galiziak komunean ditugun gauzak irudikatzen ditut normalean, auzolana da horietako bat. Lana, festak… auzo baten bizia irudikatzen saiatu naiz». Lehen aldia da horma bat bere irudiekin margotuko duela, «erronka handia eta luxua da niretzako».
Margoketa lanaren prozesua grabatzen ari dira egin bitartean hainbat auzotar. «Uste dugu garrantzitsua dela memoria hori gordetzea etorkizunerako», azaldu du Sanzek.
