Iratzerri: "Lezoko energia trantsizioa inoiz baino beharrezkoagoa da"
Taldeak urgentziazko bilera bat eskatuko dio Lezoko Udalari, larrialdi energetikoaren aurrean herriari egokituriko plan bat garatzeko.
Txirotasun energetikoari aurre egiteko neurriak eskatuko dizkiote udalari. 
Bueltan da Iratzerri, eta lanerako gogoz. Energia trantsizioa inoiz baino beharrezkoagoa dela uste du taldeak, eta kolaboraziorako deia egin die lezoarrei: “Gurekin bat egitera eta egoera kezkagarria zabaltzen laguntzera gonbidatzen zaituztegu. Zerbait egin behar dugu dagoeneko saihestezina denerako lehenbailehen prestatzeko”.
Hori horrela izanik, eta negu “oso zaila” espero dutenez, hainbat eskakizun egingo dizkiote Lezoko Udalari:
Lehenik, Udal Erregistro Orokorraren bidez, 2022ko aurrekontuetarako energia krisiari eta klima larrialdiari aurre egiteko asmo eta diru partidengatik egingo diote galde datorren astelehenean: “Energia berriztagarrien garapen urriak arduraturik, honen inguruko zein egitasmo dituen azaltzeko eskatuko diogu”. Lezo atzean geratzen ari dela uste dute, “mugitzeko garaia da”.
Udal teknikari eta politakariekin urgentziazko bilera bat egin asmo dute, ezinbestekotzat baitute larrialdi energetikoaren aurrean udal batzorde edo mahai bat sortzea. Hori esanda, hiru behar identifikatu dituzte udalerrian:
- Larrialdi energetikoaren aurrean udal batzorde bat sortzea, herriari egokituriko energia plan bat garatu eta jarraipena egingo diona.
- Txirotasun energetikoari aurre egiteko neurriak hartzea: “Bonu sozial elektriko, termiko eta uraren inguruan txirotasun energetikoan bizi diren kolektiboak identifikatu eta laguntzeko moduak zehaztu behar dira”.
- Herritarrentzako arreta zerbitzua zabaltzea gai guzti horien inguruan informatzeko eta aholkatzeko.
Herritarrei ere zuzenean mintzatu zaie taldea: “Udazkenean, autokontsumoari eta autokontsumo partekatuari buruzko hitzaldi bat edo bi egin nahi ditugu eta parte hartzera gonbidatzen zaituztegu. Herria herritarrona da, garatzea eta zaintzea gure esku dago. Egin gaitezen komunitate!”.
Egoeraren diagnosi sakona egin du Iratzerrik. Dokumentua jasotzeko edota informazio gehiago eskuratzeko, Telegram taldea dute.
