Etorkizunari buruz hausnartzeko kapsula Trintxerpen jarri dute
Gudari plazan egongo da egun osoan zehar tramankulua, Gipuzkoako etorkizunari buruz hausnartu eta pasaitarrak etorkizunarekin konprometitzera gonbidatzeko.
Eider Mendoza eta Lore Suarez, Gudari plazan jarritako kapsularen barnean. 
Trintxerpeko Gudari plazan lur hartu du gaur goizean Gipuzkoako etorkizunari buruz hausnartzeko kapsulak. Herritarrek lurraldearen biharraren inguruan dituzten ekarpenak jasotzeko helburua du tresnak.
Eider Mendoza Gobernantza diputatuak barrutia bisitatu du gaur goizean, Izaskun Gomez alkatearekin eta Lore Suarez zinegotziarekin batera. Foru arduradunak azaldu duenez, ekimen parte hartzailearen helburua herritarrengana hurbiltzea da, haien hausnarketak, kezkak eta ekarpenak entzuteko. “Horrela, aldundiak bultzatutako Etorkizuna Eraikiz bezalako ekimenen bidez, Gipuzkoaren etorkizuneko erronkei herritarrekin batera erantzuten saiatzen gara”, adierazi du.
Kapsula Trintxerpen egongo da gaurko egun osoan zehar, pasaitarrek garrantzia zeri ematen dioten jakiteko, euren kezka eta gogoetak jasoaz. Horretarako, Gipuzkoa 2040ean nolakoa imajinatzen duten galdetuko diete. Herritarrak gogoeta egitera eta lurraldearen etorkizunarekin konprometitzera ere gonbidatu nahi dituzte.
Etorkizuna Eraikiz kapsularen bigarren fasea bukatuta, jasotako ekarpenak aztertu eta Etorkizuna Eraikiz egitasmoan txertatuko dituzte. Proiektu horrek lurralde historikoaren etorkizuneko erronkei erantzuteko lan egiten du. Bihar Deustuko Unibertsitatera (Donostia) lekualdatuko dute tresna.
