Udal langileen soldata igoerarekin kezka azaldu du Lezoko EH Bilduk
Langile guztiei soldata gutxienez maila bat igotzea eta musika eskolako arduradunari %10ean igotzea da udal gobernuaren asmoa. EH Bilduk hori justifikatzeko azterketarik ez dela egin azaldu du.
EH Bilduk jakinarazi duenez, Lezoko Udal Gobernuaren (EAJko eta PSE-EEko zinegotziek osatzen dute) asmoa da udal langile guztiei gutxienez soldata maila bat igotzea; eta Tomas Garbizu Musika Eskolako arduradunari %10eko dedikazio gehigarria ematea: horren gastua 148.655 eurokoa litzateke. Igoera horien ondorioz, 2022tik eta urtero, 143.500 euroan (udal aurrekontu osoaren %1,54) handituko da udal soldaten gastua, eta zifra horri antzinatasunak, etorkizuneko soldata igoerak nahiz dedikazio gehigarriak gehitu beharko zaizkiela zehaztu du koalizioak. “Lezoko Udalaren aurrekontuaren zati handi bat hipotekatuko luke horrek”, esan dute. Proposamena bertan behera uzteko eskatu dute, “beharrezko azterketak egin eta udal langileren baten edo batzuen soldatak egokitzeko benetako justifikaziorik egon ezean”.
Igoera horiek kontsolidatuak geratuko liratekeela zehaztu du koalizioak. Hau da, soldata maila igoerak ezingo dira berriro murriztu ondorengo agintaldietan: “Hau guztia inolako azterketa eta txosten teknikorik gabe onartu nahi dute EAJko eta PSE-EEko zinegotziek hilaren 30eko udalbatzarrean. Legeak eskatzen duen beharrezko justifikazio edo memoriarik ere aurkeztu gabe, udal idazkariak ohartarazi zien bezala”.
EH Bildukoek adierazi dute udal langileen lan baldintza duinen aldeko jarrera “argia” dutela. Baina uste dute horrelako erabakiak “ongi aztertuta” eta “ongi justifikatuta” hartu behar direla. Hala, udalaren diru baliabideak “herritar guztien ongizatea hobetzera” bideratu behar direla azaldu dute, “udalak horretarako dituen baliabide mugatuak zuhurtziaz, zorroztasunez eta modu arduratsuan kudeatu behar ditu”.
