Eguzki: "Administrazioaren burokraziaren gainetik dago ingurumena"
Oiartzun ibaira zuzenean botatzen den isuriaren afera konpontzeko Lezoko eta Errenteriako udalei elkarlanean aritzeko eskatu bazien ere, ez dela halakorik gertatu salatu du Eguzki talde ekologistak.
Oiartzun ibaira heltzen da isuria. Oiartzun ibaira zuzenean botatzen den isuriaren afera konpontzeko Lezoko eta Errenteriako udalei elkarlanean aritzeko eskatu bazien ere, ez dela halakorik gertatu salatu du Eguzki talde ekologistak, “bederatzi hilabete joan badira ere eskaera egin genuenetik”. Taldeak azaldu duenez, Oiartzun ibaiari eragiten dion isuriaren arazoaren konponketa txikia bada ere, lau administrazioren onespena behar du egin ahal izateko.
Isuriak Lezon du jatorria, Oreretako lurretan egin behar dira lanak, tutua Añarbeko Urak duen sarean konektatu behar da, eta isuria Oiartzun ibaira doa: azken hori Espainiako Gobernuaren Kosta ministerioaren eskumena da. Hori da metro eta erdiko eremu eskasean egin behar da.
Lezoko Udalarekin bilera izan zuen Eguzkik. Bertan, Kostak ministerioak prestutasuna azaldu zuela, baina Errenteriako Udalak ez zuela interesik azaldu eta Añarbeko Urak-ek ere aitzakiak jarri zizkiela azaldu zien Lezoko Udaleko ordezkariak, Eguzkik jakinarazi duenez: “Arazoa ez da konpondu, eta zuzenean isurtzen jarraitzen du”.
Arazoaren konponketa “premiazkotzat” jo du Eguzkik, eta Errenteriako Udalaren zein Añarbeko Urak-en jarrera “onartezina” dela esan du: “Jarrera alda dezatela eskatzen dugu, isuriak legea urratzen duelako, eta ingurumena eta biodibertsitatea kaltetzen dituelako. Adiministrazioaren burokraziaren gainetik ingurumena dago, eta isuria eteteko lehenbailehen konpondu behar dute arazoa”.
