Euskara ikasteko laguntzak eska daitezke gaurtik aurrera
Pasa den udako ikasturteko laguntzak eskatzeko hilaren 15era arte izango da epea. Aurtengorako laguntzak, berriz, hilaren 29ra arte eska daitezke.
Fermiñenen daude euskaltegia zein Euskara Saila.
Oiartzuarrek euskaltegian euskara ikasteagatik laguntza eska dezakete. Pasa den ikasturteko udako ikastaroetan aritu zirenek hilaren 15era arte izango dute horretarako epea.
2021-2022 ikasturteko ikastaroetarako laguntza eskatzeko epea, berriz, hilaren 29ra artekoa izango da.
Horrez gain, hilabete honetan eskatu beharko dute laguntza, baita ere, udalerriz gaindiko eremuetan euskara sustatzen duten erakundeek. Beraien kasuan, hilaren 30a arte izango dute epea.
UEU eta arlo sozioekonomikoa
Udaleko Euskara Sailak gogorarazi duenez, UEUko ikastaroetan parte hartzen duten oiartzuarrek badutela diru laguntza jasotzeko aukera. Eskaera horiek egiteko epea abenduaren 15a arte egongo da irekita.
Epe berberera arte dute arlo sozioekonomikoan euskararen erabilera sustatzeko ekintzengatik diru laguntza eskatu nahi duten enpresa, merkataritza establezimendu eta ostalariek ere.
Eskaera horiek guztiak udaletxeko harreran edo telematikoki egin daitezke. Informazio gehiago behar duena Euskara Sailarekin jar daiteke harremanetan, 943 49 38 42 telefono zenbakira deituta edo posta elektronikoaren bitartez.
