Donibaneko saneamenduaren aurreproiektua aurkeztuko dute
Ur saneamenduaren aurreproiektua diseinatu du Foru Aldundiak eta hau aurkezteko saio bat egingo dute urriaren 14an. Ondoren, azaroaren 11 arte, planaren erakusketa irekiko du udalak herritarren parte-hartzea sustatzeko asmoz.
Donibaneko saneamenduaren aurreproiektua idatzi du Gipuzkoako Foru Aldundiak, eta Añarbeko Urak nahiz Ura erakundeekin adostasuna lortu du. Orain, plan hau aurkezteko parte hartze prozesua martxan jarriko du udalak, urriaren 14tik azaroaren 11ra. Izaskun Gomez alkateak uste du herritarren parte hartzea garrantzitsua dela: “Ezinbestekoa da barrutiko bizilagun guztien partaidetza izatea, konponbidea guztiek onartu behar baitute”.
Urriaren 14an 19:00etan, Juanba Berasategi aretoan egingo den informazio-saio baten bidez kaleratuko dute lehen aldiz proiektua, aldundiko teknikariek gidatutako aurkezpenean. Bertan zalantzak argitu edota xehetasunak eskatzeko aukera izango dute bizilagunek.
Planaren nondik norakoak azaldu eta hurrengo egunean, aurreproiektuaren erakusketa bat zabalduko dute Donibaneko Kulturgunean azaroaren 11ra arte; 16:00etatik 19:00etara izango da zabalik egunero. Bertan, informazio panelak egongo dira ikusgai, baita aurreproiektuaren datu esanguratsuak biltzen dituen eskuorri bat ere. Herritarren ekarpenak edo iradokizunak jasotzeko kutxa bat egongo da halaber.
Aurreproiektuaren aurkezpen saiora joateko izena eman behar da udalaren orrialdean, Covid-19ak ezarritako aforo murrizketen ondorioz. Era berean, streaming bidez eskainiko dute gerturatu ezin dutenentzat, eta ondoren, saioa bideo batean egongo da ikusgai erakusketan.
