Irati Zabala hirugarren izan da zailtasun eskaladako Espainiako Kopan
Kopako hirugarren eta azkeneko proba jokatu dute asteburuan. Oiartzuarra bigarren izan da proba horretan, goraino iritsita, eta puntuak batuta, hirugarren postua lortu du.
Irati Zabala Muxika, brontzezko dominarekin [Arg.: Climbat Zaragoza].
Zailtasunezko eskaladako Espainiako Koparen hirugarren eta azken jardunaldia jokatu dute asteburu honetan, Zaragozan. Irati Zabala Muxika oiartzuarrak bigarren postua lortu zuen Aragoiko hiriburuko proban.
Egin behar zuten bidea tekniko eta bertikala zen hasieran, eta bukaeran erresistentziazko eta eroria. Proban hiru postuetan geratu ziren eskalatzaileek top egin zuten.
Zabalarekin batera Maria Benach eta Alba Pelfortek lortu zuten gaineraino iristea. Sailkapenetan egindako postuengatik erabaki zituzten probakoak: Benach lehendabizikoa izan zen; Zabala, bigarren; eta Pelfort, hirugarren.
Lehenago Madrilen eta Bartzelonan egindako proben puntuak batuta, Benach izan da kopan puntu gehien bildu dituena, Pelfort eta Zabala oiartzuarrak jarraituta.
Lehia ez da bukatu. Hurrengo zita Euskal Herrian izango dute, Berriobeitiko (Nafarroa) Rocopolis rokodromoan. Hileko azkeneko asteburuan Espainiako Txapelketa jokatuko dute bertan.
