Urratsez urrats ikasi, maite dena erabiliz zaintzeko
Hitano ikastaroa abiaraziko dute hilaren 19an, laugarren aldiz. Toka eta noka ikasteko saioak izateaz gain, hika aritzeko guneak dira. Nokari, lehentasuna.
Mattin Kazabon saioaren dinamizatzaileetako bat, eta Aitzol Perez de San Roman, Ttur-tturreko kide eta ikastaroan izena eman duena. Euskararen osasun egoera ez da onena, bistan denez, baina toki batzuetan besteetan baino hobea da, Oiartzunen kasuan bezala. Hala ere, oiartzuerari herrenka ibilarazten dion zapatako harritxoa hitanoaren atzerakada da.
Ttur-ttur Euskaltzaleon Bilguneak oinetakoa kendu eta txintxarra ateratzeko asmoz, hitano ikastaroak antolatu ditu. Laugarrena hilaren 19an hasiko da, eta asteburu honetan itxiko da izena emateko aukera.
Mattin Kazabon gurutzetarra eta Pili Lizaso iturrioztarra izango dira saioak dinamizatzeko ardura izango dutenak, Xabier Eizagirrerekin batera.
Kazabon pasa den urteko ikastaroan ere aritu zen hikaz hitz egiten laguntzen. «18 eta 70 urte arteko jendea hurbildu zen. Denok badiogu aprezio pixka bat. Jendeak ikusten du, argi eta garbi, hitz egiteko modu hori galtzen ari dela, eta zerbait egin behar dela, errekuperatzeko», esan du, formalismoak idatzian jasotzera uzten ez duen hitano garbian.
Gogorarazi duenez, parte hartzaileek nahasten zituzten aditzak. «Hasieran normala da, baina giro ona zegoenez, ez zegoen kezkarik». Aitzol Perez de San Roman Ttur-tturreko kidea da, eta ikastaroa antolatzeaz gain, parte hartu ere egin zuen, hitanoa ikaste aldera.
Oinak lurrera eramaten lagundu zion ikastaroak: «Batzuoi balio izan digu euskaldunberriek sentitzen dutena sentitzeko. Aditzak erabiltzeko garaian sortutako segurtasun-eza hori, pentsatzen jarri behar izana… Euskaldunzaharra naiz, bai, baina hika hitz egiten hastean, bada euskaldunberri sentsazio hori». Sentsibilizatzeko modu bat badela ziurtatu du. Kazabonek, bere aldetik, esan du saioak informalak direla.
Nokari lehentasuna
Pasa den urtean 40 bat lagunek eman zuten izena, bi saio presentzial egin, baina pandemiak saioak online bilakatzera bultzatu zuen. Ez zen gauza bera, 6-7 mohikanok jarraitu baitzuten. Jarraitu ezin izan zutenei gonbita egin die Kazabonek, aurten anima daitezen.
Oiartzuerazko hitanoa erakusteaz gain, bada praktikarako gune bat, Perez de San Romanen arabera: «Praktikatzeko gune bat eskaintzen digu ikastaroak, eta asko horren bila joango gara. Nik noka praktikatzeko gune bat behar dut. Baditut lagunak, baina denok dakigu zenbat kostatzen duen hizkuntza ohiturak aldatzea. Hasi, has zaitezke, baina gero ahaztu ere egiten duzu».
Nokari «lehentasuna» eman nahi diotela nabarmendu du Kazabonek. Oiartzunen ia entzuten ez dela ziurtatu du, tokaren erabilerarekiko aldea «ikaragarria» dela. Noka berreskuratzea «erronkarik handiena» dela iragarri du. Horregatik, generoarengatik bati hitanoz aritzea eta beste bati ez, horrekin hautsi nahi dute saioetan.
Saioak hilaren 19an hasiko dira, azaroaren 25era arte. Sei izango dira guztira, astearte edo ostegunetan, 18:30etik 20:00etara. Izen ematea 943 26 01 82 telefono zenbakira deituta edo Ttur-tturren helbide elektronikora idatzita egin daiteke. Igandea izango da izena emateko azkeneko eguna.
Ikastaroa debaldekoa izango da, maitatzen dena ordaindu behar ez delako. Oinetakoen lokarriak ongi estutu, eta urratsez urrats hitanoa berreskuratzeko bidea urratzeko.
