Zabala Enea IIren urteurrena gogotik ospatuko dute
Bertso afari elegantea, pala txapelketa, mendi martxa... Egitarau zabala antolatu du gazte asanbladak Zabala Enea II bizirik dela ospatzeko. Ateak zabalik dituztela oroitarazi dute.
Oreretako Gazte Asanbladako kideetako batzuk, urteurrena aurkezteko argazkian. Aurten bai. Zailtasunak zailtasun, lan handia atzean eta pandemiak arnas apur bat emanda, Oreretako Gazte Asanbladak ospatu egingo du Zabala Enea II Gaztetxearen urteurrena. Iaz ospatu ezin izan zuten urteurren biribilari keinu eginda, aurten, XX+1.ena ospatuko dute, eta horretarako, bihar hasiko den egitarau zabala atondu dute hilabete osorako.
Bertso afari eleganteak emango dio hasiera ospakizun egitarauari bihar bertan; datorren asteburuan, berriz, kirolari egingo diote keinu, eta pala txapelketa egingo dute Agustinetako frontoian —euria egingo balu, Fanderian—. Mendi martxak ere ez du hutsik egingo—hilaren 23an—eta horren barruan, jasoko du omenaldi goxoa Ibon Zabala zenak herriko gazteen eskutik. Kartelada berezia hilaren 29an da, eta urteurrena ospatzeko egun handia, berriz, hilaren 30ean egingo dute. Pala txapelketaren finalak jokatuko dituzte, eta bazkaria, ekitaldia, eta kontzertua antolatu dituzte.
Naroa Beltran eta Inhar Canas gaztetxera bildutako azken belaunaldikoak dira. Canasek hirugarren urtea du gaztetxean, eta Beltranek lehena, 18 eta 17 urte dituzte hurrenez hurren. «Kuadrillarekin hasi nintzen gaztetxean, uste dudalako gazteok antolatzeko espazio bat dela», esan du Canasek: «Urteurrena garrantzitsua da, gaztetxeak beste urtebete egin duelako bizirik».
Ateak zabalik gazte guztientzat
Ilusio «bereziarekin» biziko duela urteurrena dio Beltranek: «Niretzat lehen aldia izango da. Pandemia tartean, ez dugu aukerarik izan halakoetarako eta gazteontzat garrantzitsua da bizipen hori». Pandemiak eragindako zailtasunek ia hutsetik abiatzea ekarri diela dio Canasek: «Belaunaldi berri bat hasi da gainera, eta horretan zentratuta gaude». Egun, hogei gazte ari dira talde eragilean, «egunerokoan ibiltzen garenak», asanbladan gehiago biltzen badira ere.
Zabala Enea II Gaztetxeak herriko gazte guztientzat ateak zabalik dituela esan dute bi gazteek. «Urteurrenaren harira antolatutakoetan parte hartzea aitzakia izan daiteke bertaratu eta gaztetxean hasteko». Egitarau osoa gazte asanbladaren Twitter eta Instagram kontuetan kontsulta daiteke.
