'Hamaika kutixi filosofiko' kaxarako laguntza behar du Oi(h)artzun Filosofikoa taldeak
Diru bilketa bat abiatu du laukoteak esku artean duen kontakizun eta ilustrazio sortarako. Hamaika testu, hamaika ilustrazio eta horietako bakoitza lantzeko hamaika galdera posible bilduko dituzte.
'Hamaika kutixi filosofiko' izeneko kaxa. Badira bost urte Oi(h)artzun Filosofikoa osatzen duen laukoteak (Maddi Nazabal Etxebeste, Izaro Toledo Retegi, June Retegi Uria eta Xabi Salaberria Gonzalez) herrian Haur Filosofia saioak zein herritarrei bideratutako Ilunabar Filosofiko saioak antolatzen hasi zirela herriko zenbait sortzailerekin batera. Urte guzti hauetan bizitutakoak ondorengo hipotesia berrestera eraman ditu lauak: “ez dagoela gai filosofikoei buruz hausnartzeko adinik, eta espazioak eta euskarazko materialak urriak direla”.
Bada, orain, “hutsune horiei erantzuteko asmoz”, pentsamendu kritikorako euskarazko pizgarriak eskaintzea helburu duen kutixi-kaxa bat dute esku artean, Hamaika kutixi filosofiko izenekoa. Filosofiak dituen hamaika adarrak lantzeko elkarrekin lotura zuzenik ez duten kontakizun eta ilustrazio sorta bat egin dute, adin tarte guztiei begirakoa. Funtsean, kaxa bat eskainiko dute, hamaika testu, hamaika ilustrazio eta horietako bakoitza lantzeko hamaika galdera posible biltzen dituen txartelez osatutakoa. Bertan ipuinak, poemak, antzerkiak eta ilustrazioak aurki daitezke.
Eta proiektuan aurrera egiteko laguntza eskatu dute sortzaileek, “kutixi-kaxa txokoz txoko zabalduz euskaraz filosofatzeko aukera” eskaini ahal izateko. Horretarako crowdfunding kanpaina bat abiatu dute lotura honetan. 4.000 euro lortu nahi dituzte, eta horiek biltzeko diru kopuru ezberdinak ezarri dituzte.
Herritarren laguntza eskertzeko “sorpresa ttiki pare bat” ere prestatu du laukoteak: proiektuko ilustrazioetako bat daraman telazko poltsa eta ipuinetako batean agertzen den esaldi batekin apaindutako kamiseta. Eskertzen atalean ere aipamena jasoko dute ekarpena egiten duten guztiek.
22 sortzaileen lana ordaintzeaz udala arduratuko da, horregatik material bera argitaratzera bideratuko dute herritarren ekarpen bakoitza. Azaroaren 13an amaituko da ekarpenak egiteko epea. Aurreikusitako kopurura iritsiz gero, hilabeteren buruan hasiko lirateke banaketa egiten. “Gure asmoa eta nahia da sari guztiak abenduaren 23rako beranduenez zuen etxeetan egotea”.
Ondorengoak dira kutixiak eta herriko sortzaileak:
- Filosofia: Pello Añorga Lopez eta Idoia Beratarbide Arrieta.
- Egia eta pentsamendua: Ane Labaka Mayoz eta Mariñe Arbeo Astigarraga (Txakur Gorria Sormen Kolektiboa).
- Errealitatea(k): Alaia Martin Etxebeste eta Onintza Etxebeste.
- Gizakia: Oier Guillan Bermudez eta Iosu Mitxelena Usain.
- Bizitza eta heriotza: Olatz Mitxelena Larreta eta Udane Ansa Iragorri.
- Kultura eta kulturak: Jon Martin Etxebeste eta Alaia Gaztelumendi Mendarte.
- Ongia eta gaizkia: Goiatz Labandibar Arbelaitz eta Ane Narbarte Lasa.
- Elkarbizitza: Karmele Mitxelena Etxebeste eta June San Sebastian Sein.
- Gizakia eta natura: Antton Kazabon Amigorena eta Jokin Mitxelena Erize.
- Emozioak: Miren Agur Meabe Plaza eta Eider Eibar Zugazabeitia.
- Etika eta politika: Agustin Arrieta Urtizberea eta Ainara Lasa Perez.
