Maren Galvez lezoarra, Gorka Granado sopelarrarekin, Euskal Herriko txapeldun dantzan
Galvezek eta Granadok dantza jantzi onenaren saria ere irabazi zuten. Katerin Artola-Iker Belintxon, eta Olatz Azkue-Mattin Etxebeste bikoteak ere, goian.
Maren Galvez lezoarrak eta Gorka Granado sopelarrak osatutako bikotea izan zen larunbat arratsaldean 45. Euskal Herriko Dantza Txapelketaren irabazle. Segurako Baratze pilotalekuan jokatu zen finala, hamabost bikoterekin. Horrela, Sopela herria ordezkatu zuen bikotea lehenengoz izan da dantza solteko txapelketarik handienean garaile.
73,5 puntuko balorazioa jaso zuten Galvezek eta Granadok egindako dantza saioek. Bigarren, Bergarako bikotea: Saioa Galarraga eta Julen Murgiondo (72 puntu); eta hirugarren, iazko txapeldunak Katerin Artola oiartzuarra eta Iker Belintxon lezoarra (70 punturekin), Lezo ordezkatuz.
Olatz Azkuek (Lezo) eta Mattin Etxebestek (Oiartzun) ostutako bikoteak —Oiartzun herria ordezkatu zuten— zazpigarren postua eskuratu zuen, baina sari berezia jaso zuten: lehenengoz txapelketan parte hartzen zutenen artean onenak izan ziren, eta horregatik garaikurra eman zieten.
Maren Galvezek eta Gorka Granadok, irabazteaz gain, bestelako sariak ere eskuratu zituzten, dantza jantzi onenarena adibidez. Sopelako herria ordezkatzen zutenez, gainera, Bizkaiko bikote onenaren jabe ere egin ziren.