Ondare artistikoa zaindu eta errespetatzeko eskatu du udalak
'Sutar' eskulturan pintaketak egin dituzte, eta udalak garbituko egingo duela iragarri du. Hala ere, "tristura" adierazi dute.
Hilerri ondoko eskulturan egin dituzte pintaketak. Anton Mendizabalen Sutar eskulturan pintaketak egin dituzte, eta, horren harira, Oiartzungo Udalak “tristura” adierazi kalte horien aurrean.
“Herriko ondare artistikoa guztiona dela adierazi eta, errespetatzea eta zaintzea ere herritar guztion ardura dela azpimarratu nahi du udalak. Are gehiago, arte diziplina ezberdinen arteko errespetua dagoenean tartean”, esan dute.
Hilerriaren ondoan dagoen eskulturan egin dituzten pintaketak garbituko dituztela iragarri du udalak.
Anton Mendizabalen eskulturak mairu baratzak eta cromlechak irudikatzen ditu. 2008an jarri zuten hilerriaren ondoan, eta duela lau urte inauguratu zuten, herriko mairu baratzen eta cromlechen mapa egin zenean.
EAJren eskaera
Bere aldetik, Oiartzungo EAJk, gaiari buruz txiokatu du. Esan dutenez, herritarren kontzientziazioa “beharrezkoa” da, herriko espazioak garbi mantentzea eta hiri-altzariak baldintza egokietan izateko.
“Erantzukizuna herritarren eta udalaren artekoa da“, gaineratu dute. Horrela, Oiartzungo Udalari eskatu diote kaleen egoera hobetzeko, pintaketez eta kartelez “beteta” daudelako.
“Pozten gara kasu honetan Mendizabalen Sutar eskultura garbitzeagatik”, zehaztu dute, “baina egoera berean dauden udalerriko gainerako espazioetan ere gauza bera egitea eskatzen dugu”.
Pintaketa horien egileak bilatzea eskatu diote udalari, eta haiek ondorioren bat izan dezatela. “Horrelako jarrerak gutxituko lirateke. Horrela, Oiartzun guztiontzat atseginagoa izango baita“.
