Kolapsora eramango ditu ikusleak OzZinemak
'El Colapso' seriearen kapitulu guztiak bi egunetan emango ditu zineklubak.
El Colapso seriearen irudi bat. Zer gertatuko litzateke gizartearekin bat batean sistema kolapsatuko balitz? Egoera horren aurrean jarriko ditu OzZinema zineklubak ikusleak datorren astean. El Colapso miniseriea aukeratu du, bere hitzetan, “azken urteetako miniserierik iraultzaile eta harrigarrienetako bat, eta kapitulu guztiak bi egunetan emango ditu, datorren astelehenean eta asteartean, zehazki.
“OzZinemaren kezketako bat beti izan da zinema esperientzia telesailen eremura zabaltzea, eta orain aukera egokia iritsi da”, azaldu dute arduradunek. Gertaera batek kolapsoa eragin du Frantzian, eta munduan, eta filmak bizirauten saiatzen diren pertsonen etsipena eta ihesa erakusten ditu. Zortzi kapituluetako bakoitza sekuentzia planoan errodatuta dago. Kapitulu bakoitzak 20 minutu irauten du.
Lehen saioa astelehenean egingo du Ozzinemak —lehen lau kapituluekin— eta bigarrena, asteartean —gainontzeko lau kapituluekin—; biak, 19:30ean. Niessen zinemetan izango da, eta sarrerak 4 euroan eros daitezke.
