VI. Kirol Astea azken txanpan sartu da
'6.000' metroan dokumentala eskainiko dute gaur arratsaldean, ondoren Felipe Uriarterekin solasaldia egiteko. Bihar, Kirol Saria Guruzne Azpirozi.
'6.000 metroan ere' espedizioko kideak. Oiartzungo VI. Kirol Astearen azkeneko bi egunak izango dira gaur eta bihar. Gaur arratsalderako dokumental baten proiekzioa antolatu dute.
6.000 metroan dokumentala emango dute, Felipe Uriarte sanjuandarrak zuzendutakoa. Udaletxeko pleno aretoan izango da emanaldia, 19:00etan hasita, eta ondoren Uriarterekin berarekin solasaldia egingo dute.
Ikus-entzunezko lanean Oxigenoa Euskarari 6.000 metroan ere espedizioaren gorabeheren berri ematen da. Gazteek osatutako espedizioa Himalaia mendikatera abiatu zen 2018ko urriaren 10ean.
Euskal Herriko hamabi mendizale gazte eta bederatzi xerpa gaztek osatu zuten espedizioa. Denak batera ibilaldia egin zuten Chomolungma (Everest) munduko mendirik garaienaren inguruan.
Euskal espediziokideak Araba, Bizkaia, Gipuzkoa, Nafarroa eta Lapurdikoak izan ziren, 14 urtetik 18 urte bitartekoak. Xerpa gazteak berriz, Khumbu eskualdekoak ziren: Portse, Khumjung, Thame eta Thamo herrixkakoak, hauek ere euskal herritarren adin berekoak.
Bihar, Kirol Saria
Bihar arratsaldean bukatuko da 2021eko Kirol Astea. Oiartzuarrek aukeratutako Kirol Saria emango dute. Guruzne Azpiroz Ibargurenek jasoko du saria, udaletxeko pleno aretoan egingo den ekitaldian —19:00etan hasiko da—.
Arraunlari eta entrenatzaile ohia da Azpiroz. San Juanen eta Lapurdi Arraun Elkartean ibili da.
