Egitasmoen eragin linguistikoa neurtzeko formazioa jaso dute udalean
Euskara Zerbitzuak eta UEMAk antolatu duten ikastaroan parte hartu dute udaleko langileek zein ordezkari politikoek. Hirigintzatik harago joan dira.
Udaletxean bertan jaso dute saioa.
Udal hautetsi eta teknikariek formazio saioa jaso dute gaur. Euskara Zerbitzuak eta UEMAk antolatuta, eragin linguistikoari buruz aritu dira ELE izena duen formazio saio horretan.
Euskal Autonomia Erkidegoko Euskadiko Toki Erakundeen Legearen arabera, udalerrian gauzatuko diren proiektu eta plangintzek hizkuntzan nolako eragina izango duten aztertu behar dira.
Lege horrek dioena nola aplikatu aztertu dute bilera horretan.
Oiartzunen kasuan, hirigintzako egitasmoek hizkuntzaren arloan izango duten eragina aztertzen da. Udalaren helburua hortik harago joatea da: Hirigintza Sailaz gain, beste sailen proiektu eta plangintzek ere hizkuntzan izan dezaketen eragina neurtzea da helburua.
Modu horretan, Oiartzungo udalerriko euskararen erabileran izan daitezkeen kalte negatiboak saihestu nahi dituzte.
