Guruzne Azpiroz: "Bidean aurkitutakoak dira nire oparia"
Oiartzungo Kirol Saria banatu dute gaur, seigarren aldiz. Guruzne Azpiroz arraunlari ohiak jaso du, kirol munduari egindako ekarpenagatik.
Saria jasota, talde argazkia atera du, ekitaldia bukatzeko. Guruzne Azpiroz Ibarguren arraunlari ohiak gaur jaso du Kirol Saria. Herritarrek proposatuta, eta kirol mahaiak berretsita, arraunlari ohiak Oiartzunen aitortza jaso du bere ibilbideagatik.
Ekitaldi xumea baina aldi berean hunkigarria izan da. Enekoitz Markos Kirol zinegotziak hartu du hitza, udalaren izenean. Kirol Saria sortzearen arrazoia azaldu du hitz gutxitan: kirolean modu isilean lanean ibilitakoei aitortza publikoa egitea.
Azpirozi ematearen arrazoiak laburbildu ditu. Hainbat kiroletan aritu dela gogorarazi du zinegotziak: korri egiten, yogan, sokatiran, eskaladan eta, batez ere, arraunean, besteak beste. Azken kirol horretan modu “kuriosoan” hasi zela nabarmendu du, Girizia sokatira taldean San Pedroko elkartera arraunean aritzera gonbidatu zutenean.
Pasaiako bokalea autoz gurutzatzen baino ibilbide luzeagoa egin zuen Azpirozek: Galesen egon zen Erasmus egiten, banku mugikorra ezagutu, eta Europako uharte handienetik bueltan San Juanen hasi zen arraunean, parean hasitako arra asebete nahian.
San Juanekin ezagutu zituen bina Kontxa eta EuskoTren Ligaren eztiak, baina baita ere astero sei entrenamendu saio egitea edo taldearen ordezkari izatearen apenas eskertutako lana.
Ondoren, Lapurdi Arraun Elkarte sortu berritik deitu zutela azaldu du Markosek, eta han aritu zen entrenatzaile lanetan, kargu horrekin San Juanera bueltatzeko.
Zinegotziak bost balorerekin definitu du Guruzne Azpiroz: “Esfortzua, talde lana, konstantzia, ilusioa eta umiltasuna”. Emakume kirolariek bide gogorragoa izan dutela nabarmendu du Markosek, eta Azpiroz hasi zenetik gaur egun arte bitartean aldaketa handiak egon direla bertan. “Emakumeen kirola gaur egun dagoen tokian dago zu bezalakoei esker”, ebatzi du.
“Maitasuna eta sakrifizioa”
Jarraian, bideo bat eman dute pantaila handian, Azpirozi zoriontzeko. Bertan agertu direnen zerrenda luzea izan da: familia; lagunak; San Juan eta Giriziako taldekide ohiak; Kirol Saria aurretik jaso dutenak; Eskola Kirolakoak; udaleko ordezkariak…
Eneritz Arbelaitz alkateordeak hartu du hitza, eta laudorioak eskaini dizkio omenduari: “Guruzne maitasuna da, sakrifizioa, beste pertsonak babestea”.
Pertsonalki lotura dute, eta omenduaren izaera azaleratzeko adibide bat jarri du: Lilatoian, “200 bat emakume ateratzen ginen garaian”, Azpirozek haiei ia ezer esan gabe izena ematen zuen. “Badakizue nolakoa den Guruzne…”.
“Hemen banago, zuei esker da”
Azkenik, omenduak hartu du hitza, Kirol Saria eskuetan zuela. Txantxa tonuarekin esan du ordena aldatu egin behar dela: lehendabizi saria jaso eta, ondoren, momentu hunkigarrien txanda.
“Ez nuen sekula pentsatuko saria jasoko nuenik. Egin dudana gustuz egin dut, beste pentsamendurik gabe”, adierazi du arraunlari ohiak. Bidean aurkitu dituenak “oparia” izan dira beretzat, eta aitortza egin die bidelagun izan dituen horiei: “Hemen banago, zuei esker da”.
Eskertu du beti senideak eta bikotekidea ondoan edukitzea. “Oso garrantzitsua” izan da hori beretzako: “Ondoan edukitzearekin nahikoa izan da, ia ez da hitzik behar izan”.
Hitzartzea bukatzeko, ibilbidearen sintesia egin du lau hitzetan: “Plazer bat izan da”.
Ondoren, Joxe Migel Lopezek elkarrizketa egin dio, ibilbideari errepasoa emanez.
