Branka prozesua abiatuko du ostegunean Pasaiako EH Bilduk
"Hamabost urte barruko Pasaia nolakoa izatea nahi dugun deskribatzeko" dinamika izango dela aurreratu dute. Lau barrutien etorkizuneko argazki bat atera nahi dute.
Pasaiako EH Bilduk “hamabost urte barruko Pasaia nolakoa izatea nahi dugun deskribatzeko” dinamika bat abiatuko du ostegun honetan, Branka izenekoa. Datozen hilabeteetan gauzatuko dutela iragarri dute, eta lana, kultura eta portua izango dira prozesuan landuko dituzten lerro nagusiak. Saioak “EH Bildutik gertu sentitzen diren pasaitar guztiei” zabalik egongo direla esan dute koalizioko kideek.
Lehen saioan Pasaia, pasaitarrak eta lana titulupean, 2035. urtean nolako herria izan beharko litzatekeen hausnartuko dute. Bigarrenean aldiz, kultura, kirola eta aisialdiaz ariko dira; eta hirugarrenean, portua izango da gai nagusia. Saio guztiak (datorren ostegunekoa barne) Donibaneko kulturguneko komunikabide aretoan egingo dituzte, 19:00etatik aurrera.
“Hainbatetan hitz egin izan dugu Pasaiako EH Bilduk behar duen herri proiektuaren inguruan. Agintaldi hasieran ekin genion herri proiektua idaztearen ideiari, baina COVID-19ak eragindako egoerak eten zuen saiakera; izan ere, horrelako lana ezin da egin EH Bilduren komunitatea osatzen dugun pertsonok elkartu
gabe. Egoerak ahalbidetu duen bezain pronto berriro ere ekin diogu Branka prozesuari”, esan dute taldekoek.
Branka izena “bizi garen inguruneari erreferentzia egiteko” hautatu dutela azaldu dute. “Era ontzien osagai honen izena aukeratu dugu, aurrera begira jarri nahi dugulako, etorkizunera begira”. Pasaiako EH Bilduren “etorkizunerako begirada bildu” nahi du Brankak, finean, ” lau barrutien etorkizuneko argazki bat” atera nahi dute.
Proiektu honi ekiteko hainbat arrazoi nabarmendu dituzte, ondorengoak: “EH Bildu Pasaiak idatziz jasotzeko Pasaiarentzat duen herri proiektua, inprobisaziotik eta hauteskunde zikloen menpekotasunetik ateratzeko eta
herrigintza garatzeko ezinbestekoa delako eta Pasaia dagoen atakatik ateratzeko sormen handia behar delako eta horrek espazio eta denbora propioak behar ditu”.
Brankak herrigintza eta borroka antolatzen lagunduko duela uste dute, “prozesuak iparra non dagoen erakutsiko” baitu haien ustez. Modu malguan egingo dutela gaineratu dute, “ibiliz”. Proiekzioak, mahai inguruak, lantaldeak… Dinamika mordoa prestatu dituzte datozen hilabeteetarako.
