Modu berezian ospatu dute 50 urteko elkarbizitza
Herriko hamarka bikotek batera ospatu dute urteurren berezia, senideek inguratuta. Udalaren eskutik oroigarri bana jaso dute bikote guztiek.
'Photo-call' batetik pasatu dira bikote eta senideak. 2021 honetan 50 urteko elkarbizitza bete duten Errenteria-Oreretako bikoteek omenaldi berezia jaso dute gaur Niessen kulturgunean. Hamarka bikotek batera ospatu nahi izan dute urteurren berezi hori.
Photo-call batetik pasatu dira horietako asko ekitaldiaren aurretik. Ondoren, musika kontzertu batekin gozatu dute bertaratutako bikote eta senideek. Banan-banan bikote guztien izen-abizenak irakurri eta ezkontzako irudiak proiektatu dituzte pantaila erraldoian.
Aizpea Otaegi alkateak bikote guztiak zoriontzeaz gainera, guztiek “elkarrekin erakutsitako konpromisoa eta urteko konplizitate hori” goraipatu nahi izan du. “Hemen zaudenek seguraski oso bizi esperientzia ezberdinak izango dituzue, bakoitzak berea eta bakarra, bide errazagoak eta zailagoak izango zenituzten, poz handiko uneak eta une gogorrak baita ere, bizitzak denetik baitauka. Baina zerbait daukazue amankomunean hemen zaudenek, elkarrekiko konpromiso sendoarekin urteetako konplizitatearekin egin duzuen bidea”. Elkarrekin egindako bide hori “altxorra” dela gaineratu du alkateak. Eta altxor hori irudikatzeko, kutxa bana jaso dute bikoteek, oroigarri modura.
