Adinekoen etxeentzako 2021eko diru laguntzak onartu ditu udalak
Eskaerak hilaren 23ra arte aurkeztu ahal izango dira. Diru laguntzak lehiaketa bidez esleituko dituzte, aurkeztutako eskaerak alderatuz.
Eskaerak hilaren 23ra arte aurkez daitezke. 
Pasaiako Udalbatzak adinekoen etxeentzako 2021eko diru laguntzak ematea onartu du. Lehiaketa bidez esleituko dituzte horiek, alegia, aurkezturiko eskaerak alderatu eta baloraziorik onena lortutakoei esleituko dizkiete laguntza ekonomikoak.
Deialdiaren xedea da laguntza ekonomikoa ematea Pasaiako irabazi asmorik gabeko jubilatuen etxeei arlo hauek aurrera eramateko:
- Jarduerak (ekintzako gehienez 250,25 euro).
- Jardueretarako begiraleen kostua (kostuaren %80).
- Irteeretarako garraioaren kostua (autobus bakoitzeko 400 euro).
- Laurogei urtetik gorakoentzako ospakizuna (bazkideko 3,40 euro).
- Teknikoki ezinbestekotzat jotzen diren bestelako gastuak.
Eskaera egiten duten egoitzek hainbat baldintza bete beharko dituzte, hala nola, Gizarte Segurantza nahiz zerga betebeharretan egunean egotea, edota udalak zehaztutako hizkuntza baldintzak betetzea.
Eskaerak aurkezteko epea hilaren 23an bukatuko da. Baldintza guztiak, aurkeztu beharreko dokumentazioa, eta gainontzeko intereseko informazioa Pasaiako Udalaren webgunean kontsulta daiteke.
