[Galeria eta bideoa] Harmonia Gunea inauguratu du Lezo Herri Eskolak
Herri Eskolako soto zahar bat haurrentzako gozamenerako esparru bihurtu dute, itsasoan oinarritutako diseinu erakargarriarekin.
Harmonia Gunea du Lezo Herri Eskolak. Gaur inauguratu dute. Haurrentzako bideratutako espazioa da, eta itsasoan oinarrituta egin dute diseinua. “Harmonia Gunearen istorioa duela hilabete asko sortu zen. Soto zahar eta ilun bat zen eta berrikuntza bat egin nahi genuen. Margolari eta artistekin elkartu eta proiektu hau sortzea bururatu zitzaigun herriko eragileekin hitz egin ondoren. Beraien beharrak identifikatu eta eremu honentzat erabilera desberdinak definitu genituen. Eskola komunitatearen izugarrizko lankidetza topatu dugu bidean”, azaldu du Olatz Aldabe Herri Eskolako zuzendariak gaurko inaugurazio ekitaldian. Lurdes Castillo Hezikuntza guraso elkarteko kideak ere parte hartu du ekitaldian. Udal talde politikoetako nahiz herriko hainbat eragiletako ordezkariak ere izan dira irekitze ekitaldian.
Euskal Herrian ez da Lezoko azpiegituraren parekorik, lehena da herrikoa. Herri Eskolak hainbat erabilera emango dizkio eremuari.
Gunea XYZ diseinu integral tailerreko Iker Linazasorok eta Xanti Solanok sortu dute. Nabarmendu dute haurren iritziak oso baliagarri izan zaizkiela diseinua fintzerako orduan, “haurrak bezero zintzoenak direla argi dago”. Era berean, umeek gozatzeko eremu bat sortzea izan dela euren xedea azaldu dute sortzaileek, “luxua izan da proiektu hau sortu eta aurrera eramatea”. Lezok espresio artistikoari ematen dion bultzada txalotu dute diseinatzaileek, eta Herri Eskolak haiengan jarritako konfiantza eskertu dute.
Inaugurazio ekitaldian Jokin Bildarratz Eusko Jaurlaritzako Hezkuntza sailburua izan da. Adierazi du Lezo Herri Eskolan ilusioa eta pasioa sumatu dituela, “gurasoentzat oso aberasgarria da hori”. Pandemia garaia hezkuntzan latza izan dela adierazi du Bildarratzek, eta Harmonia Gunea eta antzerakoak aurrera ateratzea beharrezko dela nabarmendu du: “Auzolana txalotu behar da, guztien artean aurrera eraman duzue proiektua”. Irakasleen lana eskertu egin du sailburuak.
Jesus Mari Martiarena alkateak, bere aldetik, gaurko eguna udalarentzat oso berezia dela adierazi du: “Proiektu ederra osatu dute, eta hau ikustera eta gozatzera bertaratu zareten guztioi eskerrak eman nahi dizkizuegu”.
