Hilaren 20an Bilboko kaleak betetzeko autobusa, barrutiz barruti
EH Bilduk Bilbon deitutako manifestazio nazionalera bertaratzeko autobusak Pasaiako lau barrutiak zeharkatuko ditu. Izena eman behar da aurretik.
Hilaren 20an "Bilboko kaleak betetzera" deitzeko bideoa egin du EH Bilduk. Bertako irudia da honakoa. 
Aske eta berdinen Euskal Herria lortu arte lelopean, manifestazio nazionala deitu du EH Bilduk Bilbon, hilaren 20rako. Bertaratzeko autobusa atera dute pasaitarrek, eta barrutiz barruti jasoko dituzte bizilagunak “herri bat eta nazio bat garela demostratzeko”. Lekua erreserbatzeko izena eman beharko da honako formulario honen bidez.
Lehen geldialdia Meipin egingo dute, 15:00etan sanjuandarrak jasotzeko. Handik Antxora abiatuko dira, eta 15:10etan Ibaiondon jasoko dituzte bertakoak. San Pedron 15:20etan gelditu dira, eta azkenik, 15:25ean, Trintxerpeko elizako aldapan.
Manifestazioko aldarriak
Data ausazkoa ez dela argi utzi du bilkideen koordinatzaile nagusi Arnaldo Otegik, izan ere, azaroaren 20a Franco diktadorearen heriotzaren urtemuga baita. Ez hori bakarrik, 1984ko azaroaren 20an Herri Batasuna HBko buruzagi Santi Brouard hil zuen GALek, eta bost urte geroago, egun berdinean, Espainiako Kongresuan HBk zituen ordezkarien kontra egindako eraso batean, Josu Muguruza hil zuten. 2021eko azaroaren 20an, goizean, biak omenduko dituzte.
Arratsaldeko manifestazioa 17:30ean abiatuko da La Casillatik. Bidean, Brouard eta Muguruza gogoan izateaz gain, izurriaren ondoren jendea batzeko topagunea ere eraiki nahi dute. Otegiren hitzetan, hilaren 20ko protestarekin Euskal Herria nazio bat dela eta errespetua merezi duela aldarrikatuko dute. Bide horretan, “beste agertoki batera” heltzea dute jomuga, ezkerrekoak eta independentistak diren eragileak batuz.
