Kultura eta teknologia uztartzeaz hausnartzeko webinarra egingo dute
Saioaren helburua kultur produktu eta zerbitzuak teknologiaren bidez merkaturatzeak duen erabilgarritasunari buruz hausnartzea da.
Webinarra antolatu du Oarsoaldea Garapen Agentziak kultur produktu eta zerbitzuak teknologia erabiliz merkaturatzeak duen erabilgarritasunari buruz hausnartzeko. Saioa Innobasqueren RIS3 Euskadi jardunaldien barruan kokatzen da, eta hilaren 17an eskainiko dute.
“Aurrerapen teknologikoek eta, batez ere, horien erabilerak, eragin eraldatzailea izan dute gizartean eta negozio ereduetan”. Premisa horretatik abiatuz, eta horrenbestez, kultura ere eraldatzen ari denez gero, funtsezkotzat jo du Oarsoaldeak sektore horretako eragileak sareko funtzionamendura egokitu daitezen.
Kultura- eta sorkuntza-sektoreko enpresen topagunea izan nahi duen webinarraren helburua da kultura-sektoreko enpresek teknologiaren erabileraren bidez zein merkaturatze bide dituzten aztertzea. Saioa 16:00etan hasi eta 17:30ean bukatuko da, eta Zoom plataformaren bidez eskainiko dute.
Izen ematea formulario honen bidez egin beharko da hilaren 16a baino lehen. Topaketa zuzenduta dago, bereziki, kultura- eta sorkuntza-sektoreko enpresei, musika alorreko eragileei eta museoen esparruko erakunde turistikoei.
