Pasaia Kayak sendo Bizkaiko uretan
Txukun aritu ziren aurreko asteburuan Pasaia Kayakeko palistak, eta podiumera igo ziren A eta B azpikategorietan. Bihar, Trintxerpen jokatuko da Gipuzkoako Eskola Kirolaren 3. piraguismo proba.
Irteera masiboa, urduria eta ikusgarria izan zen, neska eta mutil guztiak batera. Pasaitarren aldetik, Bulman, Bravo eta Pimentao (101) ageri dira argazkian, hurbiletik urrunera. Aurreko larunbatean Plentziako itsasadarrean lehiatu ziren Pasaia Kayakeko zortzi neska-mutilak, Euskal Herriko sei kluben aurka. Bihar, aldiz, Trintxerpen izango da Gipuzkoako Eskola Kirolaren 3. piraguismo proba 15:00etan hasita, eta “garaipenaren bideari” eusten saiatuko direla adierazi du taldeak.
Izan ere, A eta B azpikategorietako podiuma zapaldu zuten joan den asteburuan klubeko gazteek. 3.000 metroko arauzko ibilbidea osatu zuten denek batera, triangelu formako eremuan, 1.000 metroko zirkuituari hiru bira emanez, baina sailkapenak sexuaren eta urtearen arabera egin zituzten.
Emaitzei dagokienez, Oinatz Alonso A azpikategoriako Oihan Irizarrekin ibili zen lehia gogorrean, eta 18 minutu eta 4 segundoko denborarekin, B azpikategoriako sailkapeneko lehenengo postuan gailendu zen. Gainera, azpikategoria horretako bigarrena klubeko Iraitz Izagirre izan zen “lan oso txukuna” burutuz, taldearen esanetan.
A azpikategorian maila erakutsi zuten ere pasaitarrek, eta hurrenez-hurren, bigarren eta hirugarren izan ziren Gorka Bravo eta Asier Bulman.
Bestalde, Aihora Castrok irabazi zuen bigarren postua B azpikategorian, eta jarraian 2 segundoko aldearekin, sailkatu zen Maialen Lizaso. A azpikategorian ere podiumera igo ziren neskak, Uxia Pimentao hirugarrena izan baizen 18 minutu eta 35 segundoko denborarekin.
