‘Zara Eres’, ni sakonera bidaiatzeko txartela
Pello Añorgak liburu berria argitaratu du, helduei —gehienbat—begirakoa. Lourdes Elorzak egin ditu ilustrazioak. Hitz txikiak erabili ditu, zentzu handienera iristeko.
Pello Añorga, 'Zara Eres' liburuarekin. Zara Eres liburua (Mr. Momo argitaletxea, 2021) erditzeko prozesua luzea izan dela esan du Pello Añorgak. “Hamar urte inguru”, zehaztu du. Non zaude?, Nora joan zara?, Zer ari zara bilatzen?, Gordeta ote zaude?, Ez zara inon ageri… moduko galderak eraman ditu paperera Añorgak.
“Musulmanak, kristauak, ateoak edota agnostikoak gaiarekin gustura sentitzeko testuak idatzi ditut. Hor erreferentzia izan dut Joxe Arregi frantziskotarra. Gai potolo bat denez, sinesmen ezberdinetako jendearengana iritsi nahi nuen”, esan du Añorgak. Gai handiak izanagatik, “hitz ñimiñoak” erabili ditu, “adierazpide zabalenak” izan ditzaten.
Esku artean duen alea ireki du Añorgak, eta orrialdeak pasatzen ari den heinean, irakurtzen hasi da. Esaldi edo testu zati bakoitzaren ondoko orrialdean ilustrazioak ikus daitezke. Akuarela itxura dute, koloreak aldatzen joaten dira, eta bat-batean, Añorgak esaten du orainaldira eramaten duela irakurlea. Koloreak bizituz doaz. Bidaia bat dirudi Zara Eres-en edukiak, baina ez da bidaia turistikoa.
«Album hau da haurrekin, gazteekin edo helduekin lantzeko. Hemen hitz egiten da identitateaz, edo ni sakonaz —nirik gabeko niaz—, edo barnekotasunaz. Kontzeptu horiek hustuta agertzen dira, etiketetatik eta ideologietatik harago». Añorgaren arabera, esaten dena bezain garrantzitsuak dira isiluneak.
Elorzaren lehen aldia
Lourdes Elorzak egin ditu ilustrazioak. Arte terapeuta da berez, eta estreinakoz ilustratu du liburu bat. Añorgak aspaldi ezagutu zuen Elorza, eta bazuen berarekin elkarlanean aritzeko gogoa. Hainbat ilustratzailerekin aritu zen hizketan, eta denek zaila ikusten zuten gaia ilustratzea.
Elorzak pausoa eman zuen. «Eskertzekoa da bere jarrera, askotan ilustratzaileek ez baitute aldaketak egiten uzten», zehaztu du idazleak.
Teknologia agintzen ari den momentuan humanismoaren beharra ikusten du, ez du harritzen filosofiaren inguruan mugimendua abiaraztea. Horren adibidetzat jarri du Oi(h)artzun Filosofikoa taldea; liburua lantzeko interesa helarazi diote Añorgari. Bitartean, Urrats paperdendan edo Internet bidez eros daiteke.
