Hilaren 20an Bilboko manifestaziora deitu du Pasaiako EH Bilduk
Koalizioak gogora ekarri du antolatu duten autobusak barrutiak banan-banan zeharkatuko dituela. Oraindik erreserba daitezke eserlekuak.
Bilbon izango dira, datorren larunbatean, Pasaiako bilkideak. 
Pasaiako EH Bilduk gogora ekarri du autobusa antolatu dutela datorren larunbateko, hilak 20, manifestazio nazionalean Bilboko kaleak betetzeko.
Autobus zerrendan izena emateko bi aukera daude: modu presentzialean ohiko zerrenden bidez (Trintxer elkartean, Antxeta elkartean, Mimos tabernan eta Iciar tabernan) edo esteka honetan, online.
“Azaroaren 20a ez da egutegiko edozein data” gogora ekarri dute Pasaiako bilkideek; hortaz, egun horretakoa ez dela “manifestazio bat gehiago izango” argi utzi nahi izan dute. “Bilbokoa ere memoria eta iragana izango da. Etorkizunaren alde borroka egitea, memoria ariketarik sendoena delako. A-20ko mobilizazioa konpromiso indibidual eta kolektiboen ariketa bat izango da”.
“Aske eta berdinen” Euskal Herria aldarrikatuko dute. Euskaldunon burujabetzaren alde, aberastasunaren birbanaketa justu baten alde eta presoen askatasunaren alde. “Gure sendotasuna erakusteko garaia da. Bilboko kaleak betetzeko garaia da”.
