Indartzeko eguna
SOS Arrazakeriako Etxeko Langileen Taldearen ekimenez, etxeko lanaren gaineko jardunaldia egiten ari dira Merkatuzarren. Mugimendua indartzea dute asmo.
SOS Arrazakeriako Etxeko Langileen Taldeak antolatuta, etxeko lanaren gaineko bigarren jardunaldia egiten ari dira Errenteria-Oreretako Merkatuzarren. Egun osokoa da, eta goizetik arratsaldera arte sektoreko langileek dituzten zailtasun, gabezia, erronka eta egitekoen gaineko gogoeta egiten ari dira. Horretarako, alorrean esperientzia eta ibilbide kontrastatua duten emakumeak euren ahotsa eta esperientzia partekatzen ari dira, helburu zehatzarekin: etxeko langileen eskubideen aldeko mugimendua indartzea.
SOS Arrazakeriaren deiak arrakasta izan du. Batetik, hizlarien emaria interesgarria eta kontuan hartzekoa izaten ari da. Bestetik, jarraipen zabala izaten ari da iniziatiba, hamarnaka izan direlako entzutera, ikastera edo ondorenean hori guztia aplikatzera azaldu direnak. Horien artean daude lurraldeko etxeko langileak, erakundeak, garapen agentziak, sindikatuak, kolektibo feministak, emakumeen etxeak, eta emakume migranteen elkarteak, besteak beste.
Goizeko saioen ondoren, bazkaltzera joango dira partaideak. Otorduaren ondoren honakoa zain duten egitaraua:
-
16:00 – 17:30. Etxeko lana eta zainketa-lana arautzeko aukera legegileak eta kontrol-mekanismo eraginkorrak gaia landuko dute. Hizlariak: Isabel Otxoa, Lan Harremanen eta Gizarte Lanaren Fakultateko (EHU) eta Bizkaiko Etxeko Langileen Elkarteko irakaslea; Antonio Grinda, Gipuzkoako Lan Ikuskaritzako ikuskatzailea. Moderatzailea: Julia Nogueira, Mujeres Fundaziokoa eta Araba, Bizkai eta Gipuzkoako etxeko zerbitzuetan eta zaintza-zerbitzuetan lan egiten duten emakume etorkinen diskriminazio anizkoitza txostenaren egilekidea.
-
17:30 – 18:00 Itxiera.
Goizeko solasaldi bateko partaideak.
