Gazteak tokiko politiketan inplikatzeko 60.000 euro jasoko ditu udalak
Gipuzkoako Foru Aldundiak eta Pasaiako Udalak hitzarmena berritu dute gaur goizean, 2023ra arte udalerrian adingabeen parte hartzea susta dadin bermatzeko.
Ezkerretik eskuinera, Harkaitz Millan, Izaskun Gomez eta Mikel Pagola, gaur goizeko aurkezpenean. 
Gaur goizean egin dute, Arizabalo Jauregian, Pasaiako Udalaren eta Gipuzkoako Foru Aldundiaren arteko lankidetza hitzarmen berriaren aurkezpena. Akordio horrekin 60.000 euro jasoko ditu udalak, herriko haur eta nerabeen parte hartzea sustatzeko lurraldeko politika publikoetan.
Izaskun Gomez alkatea, Harkaitz Millan Kultura eta Gazteriako diputatua, eta Mikel Pagola Aldundiko Parte Hartze zuzendaria izan dira jendaurrean hitzarmenaren berri eman dutenak. Pasaiako udalburuak hartu du lehen hitza aitortzeko aldundiaren laguntza oinarrizkoa dela herriko gazteenak udal dinamiketan integratzeko eta, funtsean, “haurrei ahotsa emateko”.
Millanek eredugarritzat jo du Pasaiako Udalak 2003tik gaurdaino arlo horretan egin izan duen lana, eta esperientzia hori lurraldeko beste herri batzuetara zabaltzeko nahia berretsi du. Pagolaren arabera, “orokorra da”, gazteen artean, “politika publikoekiko interesik eza”; hori dela eta, inoiz baino beharrezkotzat du hark halako akordioetan indarra jartzea.
Gaur sinaturiko paktua 2023ko irailaren 30era arte egongo da indarrean. Denbora horretan hainbat konpromiso bete beharko ditu udalak, besteak beste, martxan den Eskubidean plana indartzea, lan espazio berriak ahalbidetzea, gurasoen foro bat sortzea, edota aholkularitza zerbitzu bat abiaraztea. “Ziur gaude bi urte hauetako helburuak beteko dituela Pasaiako Udalak”, sinetsita agertu da Millan.
