Elkartasunari hegoak jantzi dizkion egutegia eskura
Egutegi solidarioa salgai du Juneren Hegoak elkarteak, eta aurten kolaborazio berezia izan du. Bildutako diru guztia elkartearentzat izango da, egiten duen ezinbesteko lanarekin jarrai dezan.
Juneren Hegoak elkarteak kalean du jada datorren urteari begira atera duen egutegi solidarioa. Elkartearentzat, eta hortaz, artatzen dituen Gipuzkoako familiak laguntzen jarraitzeko, diru baliabideak lortzea du helburu. Egutegiak, mahaikoa zein paretakoa egin dituzte, eta sortzeko garaian kolaborazio berezia izan du elkarteak. Izan ere, egutegia osatzeko baliatu dituzten argazki eta esaldiak Donostiako Deutsche Schuleko Batxilergoko ikasleek aukeratutakoak dira.
«Ikastetxe horretan filosofia ikasgaia ematen duen irakasle batek egin zigun proposamena. Elkartea ezagutzen du, baita egutegiaren inguruko iniziatiba, eta berak proposatu zigun bere ikasleek ilustratzea zaurgarritasuna, pertsonen hauskortasuna eta zaintzaren beharra bezalako balioak lantzen zituzten bitartean», azaldu du elkarteak.
Bide horretan, elkartean boluntario ari diren zenbait pertsonek ikasle horiekin hainbat informazio saio partekatu dituzte, eragilearen egitekoa zein den azaltzeko. «Egunerokoan elkartera jotzen duten familiekin egiten dugun lana azaldu diegu, eta horretaz gain, zoritxarrez, edonori tokatu dakiokeen errealitate horren gaineko hausnarketa zabaldu dugu gazteen artean».
Juneren Hegoak elkartearen lana haurren gaixotasuna edo dolu egoera bizitzen ari diren Gipuzkoako familiei babes sarea eskaintzea da, egoera gogor horri bakarrik erantzun behar ez izateko.
Hamabost familia, 60 boluntario
Iazko datuen arabera, hamabost familia artatu zituen sare horretan elkarteak, eta lan horretan, berriz, 60 pertsona inguru ari dira hainbat arlotan banatuta: familiak, boluntarioak, sentsibilizazioa, komunikazioa, materialaren salmenta, administrazioa, plangintza, ekitaldiak, eta mantentze lanak.
Egutegia bi formatutan eskura daiteke; mahaiko egutegia 3 euroan dago salgai eta paretakoa 5 euroan. Horiek web orrian eros daitezke, edota bertan kontsultatu salgai duten saltokien zerrenda.
Salmentarekin lortutako dirua Juneren Hegoak elkartearentzat izango da, duen egiteko gogor, beharrezko eta duina egiten jarrai dezan; elkartasunari hegoak janzten segi dezan. 5
