SOS Antxo koordinakundea, "bizilagunen duintasuna defendatzeko"
Taldearen aurkezpena bihar egingo dute, 20:00etan, Antxoko Kultur Etxean. Manifestazioa eta sinadura bilketa ere antolatu dituzte aurreragorako.
Manifestaziora aterako dira abenduaren 11n, larunbata, antxotarrak. Artxibo irudia da honakoa. 
Joan den astean egin zituen SOS Antxo koordinakundeak lehen agerpenak sare sozialetan. Gaurdaino, ordea, ez du inork elkargoaren izateko arrazoia publikoki aurkeztu, ez eta zein helburu izango dituen aitortu ere. Horretarako parada bihar izango dute (asteartea), 20:00etan, Antxoko Kultur Etxean, orduan egingo baitute aurkezpen ofiziala.
Taldeburuek aurreratu dute Antxoko biztanleekiko “begirune eza” eta “erakundeen kudeaketa eskasa” salatzeko sortu dutela SOS Antxo, sinetsita baitaude bizilagunak “bigarren mailako gizarte gisa” tratatzen dituztela hainbat aginte organo publikok. Hori horrela, koordinakundeak “gihar” bihurtu nahi du barrutiko elkarte sarea nahiz herritarrak batarazteko.
Lurperatze lanetarako, bizilagunen partaidetza
Etorkizun laburrera begira jarri dira lehen ekintzak martxan jartzeko: topoaren lurperatzea hartu dute ahotan. Aurki hasiko dira obrak, eta horiek sortuko dituzten afekzioen berri emateko ez ezik, parte hartze prozesu bat martxan jar dezan eskatu nahi diete Pasaiako udal arduradunei, “gure iritziak, alegazioak eta proposamenak jasoak izan daitezen”.
Eskaera hori sostengatzeko sinadura bilketa jarriko dute martxan abenduaren 4tik aurrera. Zerrendan izena eman ahal izango da kalean zehaztutako puntuetan, merkataritza establezimenduetan eta baita online ere.
Aipaturiko aldarriak kalera eraman nahi dituzte. Abenduaren 11n, larunbata, barrutia zeharkatuko duen manifestazio bat egingo dute 13:00etan. “Antxotar guztioi dei egiten dizuegu prozesu hau eta beste helburu batzuk aldarrikatzeko. Defenda dezagun gure duintasuna! SOS Antxo koordinakundea, aurrera!”.
