1743an euskara hutsean idatzitako gutun bat aurkitu dute udal artxiboan
Iago Irixoa historialariak aurkitu du, "kasualitatez". Gutuna eskutitz pribatu bat da, Oiartzungo zirujaua zen Auger Greciet (Oier Gerezieta) hazpandarrak herriko bikarioari (Jose Fagoagari) bidalitakoa.
Ezkerretik eskuinera, Jexux Leonet Oiartzungo alkatea,
Koro Pascual Oiartzungo udal artxibozaina eta
Iago Irixoa Ereiten Kultur Zerbitzuetako historialaria. Oiartzungo udal artxiboan 1743an euskara hutsean idatzitako gutun bat aurkitu berri dute, “kasualitatez” gainera. Iago Irixoa Ereiten Kultur Zerbitzuak enpresako historialariak aurkitu du, “bestelako informazioaren bila ari zela”. Jexux Leonet alkateak “poz izugarria” hartu du aurkikuntzarekin, “Oiartzungo herriak euskararekiko izan duen harremanaren isla ere badelako hau. Hizkuntza gure herriaren ezaugarri garrantzitsua da, oraindik ere”, esan du gaurko aurkezpenean.
Historialariak nabarmendu duenez, gutun honek argi uzten du beraz XVIII. mendean korrespondentzia pribatua euskaraz izaten zela. “Anekdota” izan daitekeela esan dute gaurko aurkezpenean, baina “normaltasuna ere islatzen” duela.
Gutuna 1743ko urrian idatzitako eskutitz pribatu bat da, Oiartzungo zirujaua zen Auger Greciet (Oier Gerezieta) hazpandarrak herriko bikarioari (Jose Fagoagari) Fontainebleutik (Frantzia) bidalitakoa. Idatzian Gerezietak mesedea eskatzen dio bikarioari, “Oiartzungo bailaratik kanpo joateko udalbatzak aurretik emana zion baimena luzatzeko kudeaketa egin zezan”. Mintzaira jasoan idatzita dagoela zehaztu du Irixoak.
“Gutun honek gauza askoren berri ematen du. Batetik, erakusten du ordurako bi estatutan banatuta zeuden Ipar eta Hego Euskal Herriaren arteko harremanak estuak zirela. Eta bestetik, gezurtatzen du euskalki ezberdinetan mintzatzen ziren euskaldunek ez zutela elkar ulertzen”, erantsi dute gaurko aurkezpenean.
