Luzuriaga Pasaiarentzat izango dela ziurtatu du Mertxe Aizpuruak
EH Bilduko diputatuak Antxo bisitatu zuen joan den ostiralean, fabrikaren eraikin zaharra eskuratzeko lorturiko diru funtsaren garrantziaz mintzatzeko.
Mertxe Aizpurua eta Mikel Garcia, joan den ostiralean, Luzuriaga fabrikaren bulego zaharren aurrean. 
Joan den ostiralean Mertxe Aizpuruak, EH Bilduren Madrilgo diputatuak, eta Mikel Garciak, Pasaiako EH Bilduko zinegotziak, agerraldia egin zuten Pasai Antxon, Luzuriaga fabrikaren parean. Berriki koalizio abertzaleak fabrika zaharra eskuratzeko lorturiko diru funtsaren garrantziaz mintzatu ziren biak ala biak.
Diputatuak Espainiako Gobernuarekin lortutako akordioa balioan jarri nahi izan zuen, berretsiz datorren urtean Pasaiako Udalak 6 milioi euro jasoko dituela Luzuriaga fabrika Kreditu Ofizialaren Institutuari (KOI) erosi eta bertan “herritarrekin batera gauzatu nahi duen proiektu kulturala abian jartzeko”.
Argi utzi zuen Aizpuruak prozesu luze baten hasiera besterik ez dela izango 2022koa, ordutik aurrera herriko udal arduradunek hartu beharko baitute lidergoa: “Orain, udalari KOIrekin negoziatzea dagokio”. EH Bilduren Madrilgo nahiz Pasaiako ordezkariak prest agertu ziren “dagokion tokietan” akordio hori lehenbailehen gauza dadin “presionatzen jarraitzeko”.
EH Bilduk Luzuriaga lortu arte amore emango ez zuela hitzeman zuela ekarri zuen gogora Mikel Garciak, “eta horrela izan da”. Agerraldia amaitzeko, Izaskun Gomez alkateari eta Loreto Osa hirigintza zinegotziari zuzendu zitzaizkien herritarren inplikazioa eta parte hartzea galdegiteko: “Bildu zaitezte behingoz herritarrekin”.
