Txiltxoko talde oiartzuarra, Kutxa Kultur Musika 2022 programan
Aurtengo egonaldian parte hartuko du, aurkeztu diren 71 taldeetatik hautatuetako bat izan baita. Entsegu lokal bat izango dute Tabakaleran eta aholkularitza profesionala eskainiko diete, "ezagutarazteko eta trebatzeko".
'Paris' abestiaren bideokliparen irudi bat. Honetan, Peru abeslaria ikus daiteke. Kutxa Kultur Musika 2022 Egonaldi programan parte hartuko duten taldeen izenak jakinarazi berri dituzte, eta horien artean oiartzuar talde bat aurki daiteke. Txiltxoko izan da, Kyxo, Julen, Lamiak, Deñe eta Tek Au Maisin taldeekin batera, aurkeztu diren 71 taldeetatik aukeratuetako bat.
Azken urteetan egindako lanaren fruitua izan da hautaketa. Askotariko abestiak kaleratu dituzte, arrakasta handikoak gainera. Hilean 17.000 entzule baino gehiago dituzte Spotify-en eta taldearen abesti askok milaka eta milaka erreprodukzio jaso dituzte. Hemen horiek entzuteko aukera.
Hautaketa honi esker, Txiltxokok lankidetza hitzarmena egingo du Kutxa Fundazioarekin. Urtebeteko egonaldia izango dute Kutxa Kultur-en (Donostiako Tabakalera eraikineko laugarren solairuan). Bertan entsegu lokal bat izango dute erabilgarri, hainbat emanaldi programatuko dizkiete eta sustapen lanerako prestakuntza zein aholkularitza zerbitzua eskainiko diete.
Lehenik, bilera bat egingo dute oiartzuarrekin, haien premiak detektatu eta beraien proposamenaren araberako lanketa egiteko. Musika ekoizpen, autoedizio, taldearen bideragarritasun plana edo sare sozialetako komunikazioaren gaineko prestakuntza emango diete. Horrez gain, kanpoko estudio batean grabaketak egiteko aukera ere emango diete.
2022ko lehen hiruhilekoan igoko da Txiltxoko Tabakalerako Kutxa Kultur Kluba aretoaren oholtzara, baina data oraindik zehazteke dute antolatzaileek.
Ondorengoa da, talde oiartzuarrak kaleratu berri duen azken abestia, bideoklip eta guzti: Zukobe.
