Urteko Batzar Nagusia egin dute Haurtzaro Ikastolako langile eta gurasoek
Guraso eta langile ugari bildu ziren atzo. 2021-2025 Ikastolako Plan Estrategikoa idazteari ekingo dio ikastolak, "ikasleen hezkuntza erdigunean jarrita, gure ikastolarentzat oinarrizkoak diren bizikidetza, herrigintza, euskara eta lankidetza hobetzeko" asmoz.
Atzoko bileraren irudia. Haurtzaro Ikastolak Urteko Batzar Nagusia egin zuen atzo, gai zerrenda luze bezain mamutsuari ekiteko asmoz. Guraso eta langile ugari bildu ziren Ikastolan bertan. Lehenik, Iñaki Uzkudun lehendakariak hartu zuen hitza, ikastolaren proiektuen eta gorabeheraren berri eman zuen hasteko.
Ondoren, Ikastolako Plan Estrategikoa 2021-2025 idazteari ekingo diotela jakinarazi zuen. “Hurrengo lau urteetarako Ikastolaren helburuak zehaztu behar ditugu eta horretara iristeko zer egin, nola egin, nork eta noiz jasoko dituen dokumentua osatuko dugu. Ikasleen hezkuntza erdigunean jarri, gure ikastolarentzat oinarrizkoak diren bizikidetza, herrigintza, euskara eta lankidetza hobetzea izango du helburu plan horrek”, esan zuten zuzendaritzako kideek.
Bestalde, BIHAR izeneko dokumentua aurkeztu zuten. Araba, Bizkaia eta Gipuzkoarako Hezkuntza Lege berriaren atarian, hezkuntzak nolakoa izan behar duen galderari erantzuteko lanketa egin du Haurtzarok bestelako Ikastolekin batera. Ondorioz, 11 proposamen jaso dituzte BIHAR dokumentu horretan. Aritz Gonzalez zuzendariak argi adierazi zuen euskal hezkuntzak behar duenaren inguruan eragile guztien arteko eztabaida “sakon eta zintzo baten emaitza izan behar duela lege berriak”.
