Presoen eskubideen alde manifestazioa egingo dute, larunbatean
Bilbo eta Baionako deialdi nazionalak bertan behera geldituta, herrietan mobilizatuko da Sare. Oiartzunen manifestazioa egingo dute, plazatik aterata.
Iazko urtarrilean Sarek egin zuen mobilizazioaren irudia. Sarek urteko lehen larunbatean manifestazioak antolatu ohi ditu Bilbon eta Baionan. Aurten, iaz bezala, bertan behera utzi behar izan dituzte bi mobilizazio jendetsu horiek.
Osasun egoera dela eta, mobilizazioak herriz herri antolatzea erabaki dute. Oiartzunen kasuan, manifestazioa 17:00etan aterako da, Done Eztebe plazatik. Elkarbizitzarako, bakerako, etxerako bidean izango da manifestazioaren leloa.
Berriak jaso zuenez, Sarek hiru arrazoi eman ditu mobilizazioei eusteko. Batetik, azaldu dute egun hori “ikur” bat dela euskal presoen eskubideen aldeko aldarrikapenean. Bigarrenik, nahiz eta urte hau “garrantzitsua” izan den espetxe politikaren “aldaketari” dagokionez —hurbiltze eta Euskal Herriratze ugari gertatu dira—, ohartarazi dute euskal preso “gehienak” Euskal Herritik kanpoko espetxeetan daudela oraindik, eta gradu progresioa “blokeatuta” dagoela: “Presoek ezin dute egin etxera itzultzeko prozesua”.
Goizerako, berriz, ekitaldi bat antolatu dute Euskalduna jauregian. Ordezkari politiko, sindikal eta sozialak bilduko dira. Ekitaldiari hasiera emateko, mahai-inguru bat egingo dute, ETA, GAL eta poliziaren indarkeriaren biktimekin.
