Urtarrileko ostiraletan Urdinola-Arizmendienea bisita daiteke
Elena Zalakain eta Joxe Mari Mitxelenak izango dute bisitak gidatzeko ardura. Doan izango dira bisitak, baina aldez aurretik erreserba egin behar da.
Urdinola etxea bisitatu ahal izango da hilabete honetako ostiraletan.
Pasa den uztailean ireki zuten Urdinola-Arizmendienea etxe museoa, eraberrituta eta herritarrei zabalduta. Hilabete horretan zein hurrengoan bisita gidatuak antolatu zituzten. Irailetik aurrera, berriz, Elena Zalakain eta Joxe Mari Mitxelenak erakutsi dute etxea.
Udalaren arabera, uztailetik aurrera 200 lagunek parte hartu dute bisita gidatu horietan, eta balorazioa positiboa denez, urtarrileko ostiraletan berriro egingo dituzte.
12:00etan hasiko dira bisita horiek, Mitxelena eta Zalakainen eskutik. Doan izango dira bisitaldiak, baina aldez aurretik tokia hartu beharko da.
Etxe museoa bisitatzeko interesa dutenak Oarsoaldeko Turismo Bulegoarekin jarri beharko da harremanetan, telefonoz deituta (943 49 45 21) edo posta elektroniko bidez idatzita.
