Urtxalle pilotaria zenaren omenezko pasaka txapelketa antolatu dute
Larunbat goizean jokatuko dute txapelketa, kontzejupean. Bizkaiko eta Gipuzkoako finaletan aritutako bikoteek elkarren aurka jokatuko dute.
Manuel Frantzisko Lekuona 'Urtxalle'-ren omenez antolatu dute txapelketa [Arg.: Ladislas Konarzewski]. Txost pilota elkarteak pasaka txapelketa antolatu du bihar goizerako. Modalitate horretan puntan ibiltzen diren lau gonbidatu dituzte, kontzejupean ari daitezen. Bizkaiko eta Gipuzkoako txapelketetako finalistak arituko dira, nor baino nor, Urtxalle txapelketaren bila.
Manuel Frantzisko Lekuona XIX. mendeko pilotari eta plazagizonak erabiltzen zuen izengoitia jarri diote txapelketari. Fama handia lortu zuen bere garaian, hainbat desafiotan parte hartuta. Musikaria ere bazen, eta bizimodu bohemioa izan zuen. Agur Jaunak abestiaren hedatzean zerikusia izan zuela dio kondairak.
Kartelera
10:30etik aurrera, Ziarrusta eta Amantegi bizkaitarrek Lizaso eta Xabier Urbieta gipuzkoarren kontra jokatuko dute lehen finalerdia. Bigarren finalerdia, berriz, Uribe-Beldarrain (Bizkaia) eta Karrera-Jon Urbieta (Gipuzkoa) izango da.
Finalerdietako galtzaileen artean 3. eta 4. postuak jokatuko dituzte. Ondoren, finalaren txanda izango da.
