Uztailera arteko kultur agenda aurkeztu du Lezoko Udalak
Guztira 56 jarduera barne hartu ditu urteko lehen egitarauak. Ekitaldiak Udal Musika Eskolan, Udal Liburutegian eta Gezala Auditoriumean izango dira.
Ezkerretik eskuinera, Ion Pombar, Jesus Mari Martiarena eta Xanti Val. 
Urte hasieratik uztailera bitarteko kultur agenda aurkeztu du Lezoko Udalak, 50etik gora jarduerarekin. Ekitaldiak Udal Musika Eskolan, Udal Liburutegian eta Gezala Auditoriumean izango dira.
Lezoko Alkate Jesus Mari Martiarenak gidatu du egitarauaren aurkezpena, Ion Pombar Kultura zinegotzia eta Xanti Val Kultura teknikariarekin batera. Udalburuak argi du, egoera epidemiologikoa dena izanik ere, kultura segurua dela; hortaz, udalak osasun eta segurtasun neurriak bermatu eta horrekiko apustu irmoa egiten jarraituko duela berretsi du.
Pombarrek “erakargarri” iritzi dio urteko lehen kultur agendari: “Guztira 56 jarduera izango dira, urtarrilaren 9tik uztailaren 3ra bitartean ospatuko direnak eta publiko guztiei zuzenduak”. Eskaintza, orotarikoa: musika, antzerkia, dantza, zinema, literatur solasaldiak… eta, bukatzeko: Orratx antzerki taldearen Ay, Karmela obra.
Agendaren antolaketan Udal Musika Eskola, Udal Liburutegia, Berdintasun saila eta Kultura sailak parte hartu dute. Horiez gain, Lezoko Zinema Txikiak, Etxetxo, Lezoko Emakume taldea eta Lezotarrak Lasterkari Taldea ere laguntzaile moduan aritu dira.
Egitaraua herrian zehar banatu da jadanik, eta hemen klik eginda ere kontsulta daiteke. Sarrerak Lezoko Udalaren webgunean jarriko dituzte eskuragai.
