Zortzi urtean luzatu den zikloa itxi du aurtengo Urtezaharrak
2013ko abenduaren 31ko bengalagatik teilapea galdu zuten bizilagunek etxean entzun dituzte aurten kanpai-hotsak. Zikloa ixteko omenaldi berezia egin eta esker ona adierazi diete alboan izandakoei.
Euskadi etorbideko 5 eta 7 zenbakien atariaren barruan eskertze plaka bat jarri zuten joan den abenduaren 30ean. 
Zortzi urtean lehen aldiz jan ahal izan dituzte aurten Urtezaharretako mahatsak euren etxean Euskadi etorbideko 5 eta 7 zenbakietako bizilagunek. Izan ere, 2014ak urtea bete berri zuenean bengala batek eraikinaren teilatuan lur hartu eta, astiro baino azkarrago, sugarrek erre zituzten 42 familiaren etxebizitzak eta azpiko bost lokalak. Suak hartu ez zuena suhiltzaileen urak ito zuen, barneko guztia ezerez bilakatuz.
Ezbehar hura aski ez eta hurrengo zazpi urteak odisea hutsa izan ziren trintxerpetarrentzat. Joan den urtean, oraindik, kalte-ordainak erreklamatzen jarraitzen zuten hainbat bizilagunek, horien artean Sonia Miranda eta Ane Piñeiro. 7 eta 5 atarietan bizi ziren haiek, hurrenez hurren.
Elkartasun olatua
Kiskalitako etxeen jabeek euren oinazea arinduko zuen elkartasun olatu batekin egin zuten topo urte horietan. Orotariko eragile eta norbanakoek eskua luzatu zieten eta, kasurako, SOS Pasaia Trintxerpe izendaturiko elkarteak 129.000 euroko txekea helarazi zien.
Joan den urtea bukatzear zela bueltatu ahal izan ziren etxera atari horietako bizilagunak, eta 2021eko Urtezaharrarekin bukatu zen amesgaiztoa.
Urte hauetan soinez soin elkarlanean aritu direnei eskerrak emateko omenaldia egin zuten abenduaren 30ean; aurreskua eskaini ez ezik, esker-emate gutuna irakurri eta alboan egondako lau barrutiko bizilagunak gogoan izateko plaka oroigarri bat desestali zuten atariaren barrualdean [alboko irudian ikus daiteke].
2022aren helduerarekin itxi da zikloa, eta «aparteko jazoerarik gabe», gainera, Pasaiako Udaltzaingoak aitortu duenez. Udalerriko poliziak mezu irmoa helarazi zien aurten ere pasaitarrei Gabon jaien karietara hedabideetara igorritako prentsa ohar baten bitartez; honako hitzak zituen titulu: «Ez bota suziri edo suzko artefaktuak».
Idazki horretan gogoan izan zituzten udaltzainek euren etxeak galdu zituzten trintxerpetarrak ere: «Has dezagun urtea alaitasunez eta maiz erremediorik ez duten egoerak deitoratu beharrik izan gabe». HITZA-ri jakinarazi diotenez, artefaktu piroteknikoek eragindako halako egoerarik ez da jazo aurten.
