Trintxerpen parke berde berria sortzea proposatu du EH Bilduk
Correos eta Zirizaren artean berdegunea sortzeko partida ukatu zuen udal gobernuak aurrekontuen negoziazioan. Eskaera berrartuko dute orain bilkideek.
Parke berria Portu Agintzak udalari lagariko eremuan eraikiko litzateke, Ziriza eta Correos artean. 
Trintxerpen “kalitatezko berdegune berria” sortzeko EH Bilduk eginiko proposamenari uko egin zion udal gobernuak (PSE-EE eta EAJ) joan den azaroan. Correos eta Zirizaren artean berdegunea sortzeko eskaera berrartuko dute bilkideek hurrengo hirigintza batzordean.
Parke berria Portu Agintzak udalari lagariko eremuan (goiko irudian) eraiki eta Aduana kaleko parking berri batekin lotzea proposatu du koalizioak: “Aparkaleku horrek 60 eta 70 plaza artean izango lituzke, horrela, egungo aparkalekuaren arazoa pixka bat arintzeko”.
Iniziatiba hura aurtengo udal aurrekontuen negoziazioan jarri zuten mahai gainean bilkideek, barrutiko elkarteekin bat eginda, 150.000 euroko partida ekonomikoa galdeginda hartarako. EAJ eta PSE-EEk kontra bozkatu izanagatik bertan behera gelditu zen, ordea, saiakera.
Erabaki horrekin, udal gobernariek “beste behin ere” trintxerpetarren beharrak alde batera utzi zituztela salatu dute oposiziokoek, izan ere, uko egin baitzioten, aldi berean, Ziriza eraikinari bizi berri bat emateko lanean diharduten bizilagun eta elkarteekin lan mahai bat sortzeko proposamenari ere.
Etsiko ez dutela berretsi dute: “EH Bilduk berriro eskatuko die hurrengo hirigintza batzordean PSE-EEri eta EAJri lan egin dezatela Trintxerpek eta Pasaiak herritarren gozamenerako espazio hori lehenbailehen lortzeko”.
