Asteburuan bada planik Errenteria-Oreretan
Irakurketa taldea, kontzertuak —bi—, erakusketak, eta antzerkiarekin gozatzeko aukera izango da ostirala eta igandearen artean Errenteria-Oreretan.
Irakurketa taldea, kontzertuak —bi—, erakusketak, eta antzerkiarekin gozatzeko aukera izango da ostirala eta igandearen artean Errenteria-Oreretan.
Ostiralean hiru hitzordu izango dira kultur agendaren barruan. Lekuona Fabrikan izango da lehenengo hitzordua: Irakurketa Erraza Euskaraz tailerra. 18:00etan izango da, eta doakoa da. 18:00etan berriz, Koldo Mitxelena Institutuak bere 50. urteurrenaren harira antolatu duen erakusketak ateak zabalduko ditu. Otsailaren 5era arte izango da bisitatzeko aukera Xenpelar Etxearen beheko solairuan, astelehenetik larunbatera 17:00etatik 20:00etara erakusketa hori.
Doinu gogorrak gustuko dituztenak zorioneko daude. Izan ere, Oarsomusikak antolatuta metal eta rock doinuek hartuko dute Niessen Kulturguneko auditorioa 21:00etan hasita. Oholtza gainean, Floxbin eta Cobra taldeak. Sarrerak 10 euroan dira salgai, online.
Larunbatean beste hiru hitzordu kultur agendarekin. Jantziaren Zentroak jantzi erregionalekin ondutako erakusketa bisitatzea da lehen proposamena. Ateak zabalik ditu larunbatetan 11:00etatik 14:00etara eta 17:00etatik 20:00etara; igande eta jai egunetan, berriz, 11:00etatik 14:00etara. Beheko solairuan atondutako erakusketaz gain, Jantziaren Zentroko erakusketa iraunkorra ikusteko aukera ere badago.
Musikarekin lotutakoa da bigarren hitzordua, izan ere, Santiago Banda zumaiarrak organo kontzertua eskainiko du Jasokundeko Andre Mariaren parrokian. 19:45ean hasiko da emanaldia.
Ginga jartzeko berriz, Hika Teatroren Tarara antzezlana; euskarazko estreinaldia izango da, gainera. Lekuona Fabrikan izango da 20:00etan eta sarrerak 8 euroan daude salgai.
