Andatzara joango dira igandean Xoxolurrekoak
Izena emateko Orkidea tabernatik pasatu behar dute interesdunek, osteguna delarik horretarako azken eguna. Igandean 08:30ean abiatuko dira herritik.
Abenduan Urkabera joan ziren taldekideak. Igandean (hilak 16) egingo du 2022ko lehen irteera Lezoko Xoxolur Mendi Klubak. Usurbil inguruan dagoen Andatzako gaina (582 metro) igotzera joango dira mendizaleak. Zehazki, Usurbilgo San Esteban auzoan hasiko dute oinezko bidea, eta Andatza igo ondoren, zeharkaldia egingo dute Aiako Andatza edo San Pedro auzora.
Hara joateko 08:30ean gelditu dira Ijurkon. Egun osoko jarduera da, beraz, partaideei eskatu diete aldatzeko arropa eraman dezatela badaezpada.
Izena Orkidea tabernan eman behar da. Helduek 10 euro ordaindu beharko dituzte, eta gaztetxoek 8. Familia ugarientzako plazen prezioa 36 eurokoa da. Osteguna (hilak 13) da apuntatzeko azken eguna.
