"Borroka hau geldiezina da, izan direnengatik eta izango direnengatik"
Hamarnaka lagun bildu ziren atzo iluntzean Antxoko Gure Zumardian, Harremantxo eta Bekoz Bekok deituriko elkarretaratzean. Nazkatuta daude.
Hamarnaka lagunek hartu zuten atzo arratsaldean Antxoko Gure Zumardia, 'Erailketa matxista gehiago ez' lelopean. 
Hainbat eta hainbat lagun bildu ziren atzo arratsean Gure Zumardian, Sara Pinaren erailketa kalean gaitzesteko. Harremantxok eta Bekoz Bekok deitua zen elkarretaratzea, eta salaketa publikoa egiteko probestu zuten bilkura.
“Aurtengo urtea, 2022a ere, ez da urte erraza izango”, hasi ziren. Lehen hamabostaldia igaro ez, eta urteko lehen erailketa matxista salatzeko hartu behar izan zuten barrutiko plaza.
Gizartearen arazo estrukturalak emakumeak zigortzen jarrai ez dezan baliabideak galdegin zizkieten instituzio publikoei. Bide horretan, osasungintza, hezkuntza, eta justizia publiko eta unibertsala funtsezko direla argi utzi zuten. “Izan ere, babestu behar gaituztenen joko- arauak berriro porrot egin du”.
Indarrak batzera deitu zituzten ingurukoak, eraldaketa bultzatu ahal izateko: “Denon artean lortuko dugu. Borroka hau geldiezina da, eta feministok beti izango dugu indarra eta ausardia aurrera egiteko, izan direnengatik eta izango direnengatik”.
