Energia berriztagarrien komunitateak sortzeko bilera, asteazkenean
Saioa Reina aretoan egingo dute 18:30ean, eta herritarrak energia komunitatea sortzeko prozesuan ahalduntzea izango du helburu.
Errenteriako Udalak Energia Berriztagarrien Komunitateak (EBK) sortzeko prozesua azalduko du datorren asteazkenerako programaturiko bileran, saio ireki batean. Reina aretora bertaratu beharko dira interesdunak 18:30ean.
Aurkezpen horretan, energia komunitatea sortzeko prozesua zertan datzan eta EBK baten ezaugarriak zeintzuk diren azalduko diete herritarrei. Herritarrak arlo honetan ahalduntzea da helburua.
Energia Berriztagarrien Komunitatea (EBK)
EBK irabazi asmorik gabeko kontsumo eta zerbitzuen kooperatiba bat da, energia berriztagarrietan oinarritutako soluzioen garapena sustatzea xede duena. Halako komunitate batean 18 urtetik gorako edonork parte har dezake (enpresa, jabeen komunitate, elkarte, etab.).
Hainbat onura aipatu ditu Errenteriako Udalak EBKak sortzearen garrantzia nabarmentzeko, besteak beste, energia kontsumoa eta CO2 isurpenak murriztea, energia fakturak murriztea, energia subiranotasuna sustatzea, gizarte kohesio handiagoa bultzatzea edota tokiko ekonomia sustatzea.
