Udal gobernuak barkamena eskatu dio LGTBIQ+ kolektiboari
Udal sailen arteko "koordinazio faltagatik" egindako akatsa izan dela aitortu dute; koloreak ezabatu aurretik kolektiboarekin hitz egitea baitzen asmoa.
Udalak kontrataturiko langileak, gaur goizean, Trintxerpeko Euskadi etorbideko zebrabide bat berriz pintatzen. Horren alboan dagoen pasabideak ostadar kolorea zuen atzora arte. 
Pasaiako udal gobernuak publikoki barkamena eskatu dio udalerriko LGTBIQ+ kolektiboari, aurrez haiekin hitz egin gabe eurek margoturiko ostadar koloreko zebrabideak zuritu izanagatik. “Udal sailen arteko koordinazio faltari” egotzi diote errua.
Antxo, Trintxerpe eta San Pedroko errepideetako zebrabide koloretsuak zuriz margotzeko erabakia Ertzaintza eta Udaltzaingoaren aginduz hartu zela azaldu dute, “Zirkulazio Araudi Orokorra betetzeko”. Txosten horren 168. artikuluak dio pasabideetako markek zuriak izan behar dutela.
Hori esanda, tokiko gobernariak ekintzagatik damu izan ez, baina jarduteko modua deitoratu dute: “Zebrabideak zuriz margotu ditugu, aurrez LGTBIQ+ kolektiboko kideekin hitz egin gabe, gure asmoa haiekin hitz egitea bazen ere. Beraz, barkamena eskatu nahi diegu akats horrengatik”.
Behin eta berriro errepikatu dute inolaz ere ez dela izan kolektiboaren aurkako erasorik, eta hura osatzen duten lagunekiko babesa berretsi nahi izan dute udal arduradunek gogora ekarriz Antxon, Molinaoko itsasadarreko eskailerak ostadarraren koloreekin margotu zirela, eta gobernuak ez duela “inola ere” planteatu ezabatzea.
Ortzadarra, beste eremu batzuetara
Gaur-gaurkoz Markina Ingeniaria, Eskalantegi eta Euskadi etorbideko zebrabideek zuriz margotuta jarraitu beharko badute ere, LGTBIQ+ kolektiboaren aldarria kalean ikusgarri bihurtzen jarraitzeko asmoa irmoki adierazi dute udal gobernariek. Ildo horretan, mugimenduko kideekin bilera bat deitzeko asmoa dutela adierazi dute, “hiri-altzariak edo beste elementu batzuk pintatzeko beste jarduketa batzuk adosteko”.
