Ander Aramendik errekorra hautsi du Mitxintxolako igoeran, 16 urterekin
Ander Aramendi sanjuandarra eta Larraitz Etxebeste oiartzuarra izan dira lehenak. Gazteen parte hartze handia nabarmendu du Itsas Mendik.
Atzo, igandea, egin zuten 90 bat korrikalarik Pasaiako puntu altuenera arteko bide gogorra, Donibaneko Itsas Mendik antolaturiko Mitxintxolako igoeran. Mendi taldeko kideen arabera, “inoizko mailarik altuena” jaso du aurtengo probak, gazteen parte hartze handiarekin.
Eguna “primerakoa” izan zela aitortu dute, eguzkia lagun, “oinezko pila” gerturatu baitziren, giro ederra sortuz bai Mitxintxolako muinoan baita gero, sariak banatzerakoan, Piraten Etxean ere. Bihotzez eskerrak eman dizkie Itsas Mendik aurten ere antolaketarako eskua eskaini dieten bizilagunei.
Eguneko protagonistengatik galdetuta, dudarik ez dute egin: Donibaneko gaztetxoak izan ziren horiek. 16 urteko Ander Aramendi Aginaga sanjuandarrak errekorra hautsi zuen 0:16:37 denborarekin; hark jaso zuen urrea. Podiumean, jarraian, Ander Iñarra Olaziregi (0:16:52) eta Oier Etxeberria Zubimendik (0:17:47) izan zituen Aramendik.
Akats bat egon zen hor, izan ere, gizonen bigarren postua Julen Aranbuenak lortu baitzuen 0:16:42 denborarekin, baina hark izena emanda ez zuenez ohartu gabe hurrengoari (Iñarra) eman zioten zilarra, eta berez laugarren beharko lukeenari (Etxeberria), brontzea.
Emakumeetan lehenengo postua Larraitz Etxebeste Lizaso oiartzuarrak erdietsi zuen 0:21:13 denborarekin, Laiane Arrospide Garmendi izan zen bigarren (0:22:15) eta Aintzane Olaizola Iruretak itxi zuen podiuma (0:23:01).
Herriko gaztetxoetan, txapela Lander Etxabe Etxeberriak eraman zuen etxera 0:18:45 denborarekin, bigarren postua Julen Olaziregi Legorburuk 0:20:28 zenbatuta, eta Jon Porta Vicentek hurrena, 0:20:53 denborarekin.
-
- Emakumeak
-
- Gazteak
-
- Gizonak
