Hausnarketarako sei panel instalatu ditu 'Mater'-ek Pasaia eta Oiartzunen
Ingurumenaren zaintzari loturiko dibulgazioa eta sentsibilizazioa helburu duten sei interpretazio panel ipini dituzte ontzi-museoaren arduradunek.
Pasaiako ontzi-museoak sei interpretazio panel instalatu ditu Pasaia eta Oiartzun artean. 
2020tik gaurdaino prestatzen ibili diren interpretazio panelak Pasaia eta Oiartzungo kaleetan instalatu ditu Mater Ontzi Museo Ekoaktiboak. Iniziatibaren xedea tokiko biodibertsitatearen, itsas hondakinen eta ohitura jasangarrien inguruan “dibulgatu eta sentsibilizatzea” da, Sara Lizartza ontziko itsas zientzialariak adierazi duenez.
Guztira sei panel instalatu dituzte bi udalerrietan: San Pedroko Torreatze plazan eta Arraunlari kalean bana, Donibaneko Bonantza ibilbidean eta horren bukaeran, Alabaortza senadian, beste bina, eta azkenak Oiartzunen, biak ala biak Makutso bideko puntu ezberdinetan.
Informaziodun kartelak topatu eta hausnartzera animatu dituzte bizilagunak ontziko kideek, besteak beste, honako galdera hauek jarriz mahai gainean: Zenbat eta zeintzuk dira badiako ur gaineko hondakinak? Ba al dakizu zein den ibaietan aurkitzen dugun hegazti zuri hankaluzea? Planetaren norabidea gure ohiturekin alda dezakegula uste duzu?…
