Urteko lehena egin du Xoxolurrek
Xoxolur Mendi Klubak urteko lehen irteera egin du, Andatza mendira. Giro goxoan egin dute bidea, baita ondorengoa ere.
Xoxolur Mendi Klubak urteko lehen irteera egin zuen atzo (igandea). Andatza mendia bere egin zuten txangoarekin bat egin zuten 33 lezoarrek. Egun polita, eguzkitsua, izan zuten. Ederki asko gozatu zuten jardueraz.
Usurbilgo San Esteban auzotik ekin zioten mendizale gazte eta ez hain gazteek Andatzara igotzeko bideari. Behin gailurra eginda, noski, ez ziren falta izan talde argazkiak, albiste honetan doazenak dira hango bi gailurretan ateratakoak. Beherako bidea egin, eta Aiako Andatza edo San Pedro auzoan atseden hartu zuten, eta hango pilotalekuan, ohikoa duten moduan, familia giroan goxo asko izan ziren jolasean.
Gogoz eutsi dio Xoxolurrek, beraz, 2022ari. Aurrerago jakinaraziko dituzte noiz eta nora izango diren urteko hurrengo irteerak.
