Emakumeen argazkiak bildu nahi dituzte Lezon, erakusketa osatzeko
Martxoaren 8aren bueltan egin nahi den erakusketarako dira irudiak. Herriko emakumeek egindakoaren garrantzia nabarmendu nahi dute erakusketarekin.
Lezoko emakumeen argazkiekin erakusketa egin nahi du, Martxoaren 8aren bueltan, Lezoko Hezkidetza Mahaiak. Arrazoia edozein dela ere, herrian ezagunak diren edo izan ziren emakumeen argazkiak behar dituzte erakusketa osatzeko: beren ogibide edo jardunagatik (dendariak, irakasleak, euskaltzaleak, erizainak, emaginak, baserritarrak, aktoreak, kirolariak, bertsolariak, kantuzaleak…), zaletasunengatik, izaeragatik edo beste arrazoiengatik nabarmendu diren andreen irudiak dira behar direnak, haien erretratuekin osatu nahi dute erakusketa. Herritarrei horiek emateko (itzuliko zaizkie) eskatu diete. Otsailaren 14ra arteko epea adostu dute argazkien entregarako.
Lezoko Hezkidetza Mahaia honakoek osatzen dute: Berdintasun Saila, osasun zentroa, Lezo Institutua, Kuadrillategi, Pasaia-Lezo Lizeoa, Lezo Herri Eskola, Haurtxokoa eta kale hezitzaileak. Hala, haiek zehaztu dute egitasmoaren helburua dela memoria historiko eta aitorpen ariketa bat egitea emakumeekiko, historian zehar eta gaur egun herriaren bilakaeran betetzen dituzten funtzio garrantzitsuak ikusarazteko
Xehetasunak
Argazkiak formatu digitalean (JPG edo PNG formatuak, 300 ppp-ko bereizmenarekin) edo paperean eman daitezke Berdintasun Sailaren egoitzan (astelehen, asteazken eta ostegunetan 09:00etatik 13:00etara). Lezoko Udalaren webgunearen bitartez ere aukera dago horiek helarazteko.
Bestalde, ezinbestekoa da argazkian agertzen diren emakumeen baimena izatea horiek erakusketan jarri ahal izateko. Gainera, erretratatutako emakumeei buruzko informazioa ere helarazi behar da: izen-abizenak, bizitokia, zergatik den nabarmena (ogibidea, funtzioak, zaletasunak…). Argazkia ematen duenaren gaineko informazioa ematea beharrezkoa da, aldi berean (izen-abizenak, telefono zenbakia eta posta elektroniko helbidea).
Argazkiak jaso, sailkatu, aukeratu eta erakusketara moldatzeko prozesuan hezkidetzaren eta berdintasunaren esparruan diharduten kideak arituko dira.
Gerora, argazki horiek Lezoko Udalaren argazki artxiboan gordeko dira, eta helburu bera duten eta herrian izango diren egitasmoetan erabili ahal izango dira, ekintza publikoetan adibidez. Prozesuan parte hartzen dutenek, horren oinarriak onartzen dituztela esan nahi du.
